Fir dat aktuellt Joer konnt d'Veterinärsinspektioun 6.582 Beiestäck enregistréieren, déi vu 407 Beienziichter gehale ginn. Dat si méi wéi 1000 Beievëlker méi, wéi nach viru fënnef Joer. D'Zuel vun den Imker ass konstant an d'Luucht gaangen. Déi Verbesserung wier dorop zeréck ze féieren, datt sech d'Verbänn vun de Beienziichter, no de signifikante Verloschter am Wanter 2012/13, mobiliséiert hätten, fir där schlechter Situatioun entgéint ze wierken, sou de Landwirtschaftsminister Fernand Etgena senger Äntwert.
Et wiere grouss Efforte gemaach ginn, fir nei Imker ze rekrutéieren. Mat där finanzieller Hëllef vum Ministère hätt d'Lëtzebuerger Federatioun vun de Beienziichter och d'Formatioun kënne professionaliséieren, andeems ee spezialiséierte Beroder engagéiert gi wier.
Beienziichter ginn
D'Formatioun fir Beienziichter ze ginn besteet aus engem theoreteschem Deel, deen op nationalem Niveau ofgehale gëtt. An engem zweeten, prakteschen Deel, fannen a Collaboratioun mat de lokalen Organisatioune Coursen am 2-Woche-Rhythmus statt. All Joer huelen ronn 60 Leit un deenen Coursen deel.
Fir scho méi experimentéiert Imker ginn och Weiderbildungscoursen organiséiert. Iwwert d'Beienzeitung, den Internetsite apis.lu a Colloquë kënnen déi Concernéiert sech och jidderzäit iwwert de Sujet vun der Beienziichterei informéieren. Am Prinzip sinn alleguerten déi Formatioune gratis.
De Landwirtschaftsminister betount weider, datt wann och an der Vergaangenheet vill Imker duerch d'Beiestierwen decouragéiert gi wieren, déi staark Thematiséierung vun deem Problem an de Medien nees méi Leit dozou beweegt hätt, fir sech an d'Beienziichterei ze lancéieren. Fir vill vun hinnen, wier den ekologeschen Aspekt deemno méi wichteg, ewéi deen ekonomeschen.
