No Clusteren "Dat ass katastrophal"
No de rezente Clusteren an Alters- a Fleegeheemer gesäit de President vun der Patientevertriedung d'DP-Ministerin Corinne Cahen an der Verantwortung. Et misst alles gemaach gi fir Infektiounsketten ze verhënneren.
No engem Joer Pandemie missten d'Responsabel vun den Haiser sech de Risike bewosst sinn a sech och dogéint ekipéiert hunn, mengt de René Pizzaferri. "Dat schéngt net de Fall ze sinn, dat ass ganz bedauerlech", esou de President vun der Patientevertriedung um Bord vun enger Pressekonferenz.
"Wat mer [...] héieren hu vun deem Cluster, wou sou vill Leit gestuerwe sinn, dat ass katastrophal."
De President vun der Patientevertriedung gesäit d'DP-Ministesch Corinne Cahen an der Verantwortung. Hie seet: wann een als Minister d'Responsabilitéit iwwer bestëmmten Domainer hätt, da misst een och dofir suergen, datt an deenen Domainer alles gemaach gëtt, fir Problemer - wéi an dësem Fall déi rezent Infektiounsketten an Heemer - ze verhënneren.
Positiv gesäit ee bei der Patientevertriedung datt eng méi genee Analys vun der Virfäll gemaach gëtt.
Méi zum Thema
Exklusiv
Cluster am Vitalhome zu Keel
Am Vitalhome zu Keel sinn 8 vun 39 Residenten zanter dem Ufank vum Mount un oder mat Covid-19 gestuerwen. Dat deelt d'Croix Rouge op eis Nofro hi mat. Insgesamt 25 Residenten an 13 Mataarbechter wiere positiv op de Coronavirus getest ginn.
Zwee weider Cluster an Alters- a Fleegeheemer
Et ginn nei Cluster an zwee verschidden Alters- a Fleegeheemer. Dat deelt d'Familljeministerin Corinne Cahen op Nofro hi mat. Zu Rodange goufen et 16 positiv Fäll, an zu Boufer goufen et der 20.
