Zu enger Invasioun ass net komm, mee d'Warnunge bleiwe bestoen, datt Russland all Moment en Ugrëff op d'Nopeschland starte kéint. Vill Experten hate virdru gewarnt, datt et e Mëttwoch zu engem Ugrëff kéint kommen.
En Zeeche vun der Eenheet
Den ukrainesche President Wolodymyr Selenskyj wollt an dëser Zäit Solidaritéit an Nationalstolz weisen. D'Regierung huet Angscht, datt dëse konstante russeschen Drock an d'Angscht vun enger Invasioun d'Land splécke kéint.
Esou gouf als Reaktioun gëschter an der Haaptstad, an de Groussstied, an och op der Grenz vun der ëmstriddener Donbas-Regioun am Oste vum Land de blo-giele Fändel gewisen. En 200-Meter-laange Fändel gouf duerch den Olympiastadion gedroen. Och d'Nationalhymn sollt am ganze Land gesonge ginn, mee dovun huet een zu Kiew net vill matkritt.
D'Ukrain gleeft Russland net
De Wolodymyr Selenskyj ass gëschter duerch d'Land gereest fir Truppen ze besichen, och zu Mariupol, ganz no um Deel vum Land, dee vu pro-russesche Separatiste kontrolléiert gëtt. Hie sot, d'Ukrain wier prett fir sech e verdeedegen.
De Risiko, datt Russland ugräift, bleift héich, seet de Westen. D'NATO gesäit kee Beweis dofir, datt russesch Truppe vun der Grenz ofgezu goufen, trotz de Wierder vum russesche Verdeedegungsministeren.
D'Ukrain gleeft Russland net, an et gëtt éischter elo Informatiounen, datt méi russesch Truppen op d'Grenze mat der Ukrain geschéckt ginn.
