No de Wale klëmmt den Drock vun der NATO op den Erdoğan. Politiker aus de NATO Memberlänner hunn den tierkesche President op e Neits opgefuerdert, de Veto fir de Bäitrëtt vu Schweden an d'NATO opzehiewen.
Wéi et heescht wieren och scho Gespréicher tëscht der Tierkei a Schweden geplangt. Wéini déi wieren ass awer net gewosst. Am Juli ass de nächsten NATO-Sommet.
Wat geschitt mat de Bäitrëttsverhandlungen an d'EU?
Iwwerdeems ass d'Tierkei zanter 1999 EU-Bäitrëtts Kandidat. 2005 hunn Bäitrëttsverhandlungen ugefaangen. Zanter fënnef Joer leien déi awer op Äis.
Ëmmer méi Politiker fuerderen elo nom Erdoğan senger Victoire, de Bäitrëttsprozess ze stoppen. D'EU-Kommissiouns-Presidentin Ursula von der Leyen betount nom Walresultat, datt et vu strategescher Bedeitung wier, souwuel fir d'EU, wéi och fir Tierkei, d'Bezéiunge virun ze dreiwen.
Haaptvermëttler am Krich
Fir de russesche President Wladimir Putin hätt dat Walresultat d'Dieren opgemaach fir d'Bezéiung zu der Tierkei ze verstäerken, heescht et vun der franséischer Presse Agence. Den Erdoğan weigert sech, sech un de Sanktioune géint Moskau ze bedeelegen.
Dofir gëllt de rëm-gewielte President awer als Haaptvermëttler am russesche Krich an der Ukrain.