De 9. August 2020 gouf am Belarus gewielt, den Alexander Lukaschenko huet sech op deem Dag selwer als Gewënner vun deene Walen deklaréiert. Et koum virdrun an dono zu groussen Demonstratiounen, déi deels brutal niddergeschloe goufen.
Repressioun gouf verstäerkt
Dräi Joer dono wier d'Situatioun fir déi, déi sech kritesch par Rapport zum Regime äussere méi schlëmm wéi jee virdrun, betount den EU-Chefdiplomat Josep Borrell an engem Statement.
Aktuell géif et bal 1.500 politesch Prisonéier ginn, sot en Dënschdeg de Kommissiounsspriecher Peter Stano virun der Press.
"Si ginn ënnert schreckleche Konditioune festgehalen, si Mësshandlungen a Folter ausgesat, ouni Accès op gesondheetlech Servicer. Et gëtt och Leit, déi am Prisong stierwen."
D'Situatioun op de Grenzen tëscht Belarus an der EU spëtzt sech zou
Polen an déi baltesch Länner bekloe sech doriwwer, datt Belarus op der Grenz bewosst illegal Migranten iwwer d'Grenz léisst. Wéinst provokanten Truppeverleeungen a Militärübungen hate Polen a Litauen déi lescht Woch annoncéiert, d'Protektioun op hire Grenzen ze verstäerken.
Et wier awer keng Iwwerraschung, datt de Lukaschenko-Regime sech un all Zort vu Provokatioune bedeelegt, déi Russland proposéiert, erkläert de Kommissiounsspriecher.
"Dës Übunge stinn am Kontext mat de russesche Versich, Stäerkt par Rapport zum Noper ze demonstréieren an ze weisen, datt d'Land d'Kapazitéiten huet, mat sengen illegalen Aktioune géint d'Ukrain virunzefueren."
EU huet 7 Sanktiounspäck géint Belarus decidéiert
Eréischt déi lescht Woch hat d'EU nei Sanktioune géint Belarus decidéiert. Dat war de siwente Sanktiounspak. Zu de Mesurë gehéiert een Exportverbuet géint Technologien, déi zum Beispill bei Dronen agesat ginn. Dernieft ass an Zukunft och de Verkaf an d'Liwwerung aus der EU vu Schosswaffen a Munitioun verbueden.
Ob d'EU iwwer weider Sanktiounen nodenkt, gouf en Dënschdeg net vun der Kommissioun kommentéiert. D'Diskussiounen doriwwer wiere confidentiel, erkläert de Spriecher vun der Europäescher Kommissioun.
