Sträit tëschent der FLF an der LFL D'Karine Reuter hofft op eng konstruktiv Zesummenaarbecht

D'Ligue deet sech schwéier mat der Iddi vun der FLF, déi iwwernächst Saison zu 15 an der ieweschter Divisioun ze spillen, well dann all Spilldag eng Ekipp spillfräi wier, an dat zu enger Verzerrung vun der Competitioun kéint féieren. Allgemeng wëllt d'Karine Reuter e Schlussstréch ënner d'Vergaangenheet zéien a sech ëm eng konstruktiv Zesummenaarbecht vun der Ligue mat der Federatioun an hirem President Paul Philipp beméien.

"Den Här Philipp ass de President vun enger ganzer Futssballs-Federatioun a muss sech ëm all d'Clibb këmmeren. Mir representéieren déi éischt Ligue, wou d'Besoine jo awer ganz spezifesch sinn, wou aner Suerge sinn, wéi an enger drëtter Divisioun. D'autant plus well mer eis lues a lues jo awer och ëmmer méi professionaliséieren, méi op e Wee ginn, wou Fussballspiller à temps plein engagéiert sinn am Fussball, a wou eben aner Besoine sinn, wéi dat nach virun zéng Joer war."

Eng vun den éischte Prioritéite fir déi nei Presidentin wier fir d'Ligue an d'Positioun ze féieren, datt se als gläichwäertege Gespréichspartner vun der FLF unerkannt gëtt.

D'LFL wëllt net acceptéieren, datt déi iwwernächst Saison mat 15 Ekippe soll gespillt ginn, wéi d'FLF et virschléit, well dann all Spilldag ee Veräin spillfräi wier, an dat zu enger Verzerrung vun der Competitioun kéint féieren. No engem perséinleche Gespréich mam Paul Philipp e Méindeg, an deem verschidde Zenarien duerchdiskutéiert gi wieren an engem weidere Gespréich mat der Ligue ass si zouversiichtlech fir en Arrangement kënnen ze fannen.