Iwwer 26.000 Echantillonen aus am ganzen 22 europäesche Länner goufen an engem Zäitraum vu 523 Joer ënnersicht. De Fokus louch virun allem op wirbellose Liewewiesen, déi ee wichtegen Indicateur fir d'Qualitéit vum Waasser duerstellen.
Virun allem an den 90er an 2000er Jore war d'Biodiversitéit an den europäesche Flëss um gudde Wee, wat op d'Beméiunge fir eng besser Waasserqualitéit zeréckzeféiere wier. Datt dëse positiven Trend zanter 2010 awer amgaangen ass ofzehuelen, géif drop hiweisen, datt d'Mesurë vu bis elo un hir Limitte stoussen, erkläert den Alain Dohet vum LIST.
Et géifen eng Rei nei Facteure ginn, déi d'Ëmwelt stressen, zum Beispill chemesch Substanzen, déi sech nëmme lues ofbauen. E weidere Probleem wieren invasiv Aarten an de Klimawandel.
LIST: Et sinn zousätzlech Mesuren néideg
An de Bannegewässer gëtt et eng méi grouss Konzentratioun u Pestiziden. Och den Drock op de Buedem - wéinst der Versigelung an der Pollutioun am stättesche Raum - sinn eng Belaaschtung, heescht et nach an der Etüd vum LIST.
Lëtzebuerg wier hei keng Ausnam. Virun allem an den urbane Raim wier d'Biodiversitéit am meeschte menacéiert: hei wier eng Renaturéierung essentiel, sou den Alain Dohet vum LIST. Fir d'Biodiversitéit nees ze stäerken, wieren zousätzlech Mesuren néideg. Sou missten d'Kanalisatiounsnetzer och ausgebaut ginn an d'Kläranlage verbessert ginn, sou den Alain Dohet vum LIST.
