Gestioun vun der Pandemie Corona-Zuele solle "pro Gemeng publizéiert ginn"
D'Santé soll reegelméisseg matdeelen, wéi vill Infektiounen et an den eenzele Gemenge gouf, fënnt de Paul Weimerskirch. Et wier net gutt, wann iwwer Fallzuelen an de Gemenge spekuléiert gëtt, seet den CSV-Buergermeeschter vu Schëffleng.
De Paul Weimerskirch ass verwonnert, wéi wéineg verschidden Informatiounen effektiv bei de Leit ukommen. "Op Facebook ginn et Messagen, wann ech déi liesen, kann ech nëmmen de Kapp rëselen." Et wier dohier gutt, wa reegelméisseg iwwer d'Situatioun vun den eenzele Gemengen informéiert gëtt. "Ech mengen, datt dat a bestëmmte Situatioune keen Nodeel ass", esou den CSV-Buergermeeschter.
De Paul Weimerskirch ass der Meenung, d'Leit hätte méi Versteesdemech fir verschidde Mesurë wann se "all Woch, oder all 14 Deeg" géife gesot kréien, wéi vill Fäll et an hirer Gemeng gouf.
Syvicol géint Publikatioun vu Fallzuelen
Dat gesinn awer net all d'Buergermeeschteren esou: vill Gemengen hu sech an de leschte Méint nämlech dogéint ausgeschwat, d'Fallzuele pro Gemeng ze publizéieren.
Den Emile Eicher, President vum Gemengesyndikat ass zwar dofir, datt d'Gemengeresponsabel séier informéiert ginn, wann et vill Infektiounen an hirer Gemeng gëtt. Hien ass awer net der Meenung, datt d'Fallzuelen aus all de Gemenger solle public gemaach ginn, well d'Gemengen och ënnerschiddlech grouss sinn:
"Mir haten de Fall schonn eng Kéier, datt iergendwou an enger klenger Nopeschgemeng e puer Famillje krank waren. Dat gesäit da katastrophal aus, wann een dat publizéiert, well een do keng Masse critique huet, déi engem eng gewësse statistesch Sécherheet gëtt. An da kann dat zu falschen Decisioune féieren."
An der Mediathéik:
LauschterenMéi zum Thema
"De Virus huet säi Verhale geännert"
Den Educatiounsminister seet, datt de Corona-Virus sech besonnesch an de Grondschoulen am urbane Raum géif vill méi séier verbreede wéi virdrun. E Freideg hofft de Minister matdeelen ze kënnen, wéi et no der Fuesvakanz virugeet.
Santé: "Och Geimpfter solle sech weider teste loossen"
Och wann ee schonn eng Impfung krut, soll ee sech weider op de Coronavirus teste loossen, seet den Thomas Dentzer. Et wier nach net kloer, ob geimpfte Leit ustiechend kënne sinn.
