Wëll Wuerzel Clever nätzen

Waasser ass eng vun de wichtegste Ressourcen am Gaart iwwerhaapt. A wann den Himmel streikt, esou wéi déi lescht Wochen, muss een nätzen. Fir datt déi Corvée net grad esou vill Aarbecht mécht, gëtt et e puer Saachen, déi hëllefen.

Als aller éischt spillt de Buedem eng wichteg Roll. E gudden Apport vu Kompost hëlleft fir d'Späichercapacitéit vu Waasser ze steigeren. Och d'Lackere vum Buedem hëlleft, well d'Waasser sech an den Huelraim vum Buedem sammele kann. An e Buedem, dee méi Waasser behält, muss logescherweis net esou vill genätzt ginn.

Als zweet mécht et vill aus, wann een de Buedem mulcht. E plakege Buedem erhëtzt sech méi séier, an d'Waasser ka méi séier verdonsten. Bléift de Buedem awer bedeckt, zum Beispill duerch Stréi, Grasschnëtt, dréche Blieder, Holzhäcksel oder am beschten eng Mëschung dovunner, ass de Buedem besser geschützt viru Sonnenastralung an Hëtzt.

Et ass besser all puer Deeg e gudde Strapp ze nätzen, wéi all Dag mat just e bëssi Waasser. Wat d'Waasser méi déif an de Buedem fléisst, wat et manner evaporéiert, wann et waarm ass. Fir datt 1 m2 Buedem bis 10 cm déif naass gëtt, brauch et 10 l Waasser. Am Fréijoer, wann d'Planzen nach net esou déif wuerzelen, geet dat duer. Dat heescht fir 20 cm déif 20 Liter an 30 cm déif 30 Liter pro m2. De Buedem kann naass ausgesinn, op der Uewerfläch, mee et ass am Beschte kuerz am Buedem ze wullen, an da mierkt ee schonn, op et weider ënnen awer dréchen ass oder net. Dat ass definitiv wichteg, wann ee richteg wëllt nätzen.