Déi aktuell Mesurë wiere just punktuell, mengt de Prof. Dr. Claude P. Muller. "Nëmmen déi individuell oder kollektiv Immunitéit kann dorunner eppes änneren".
Dofir misst ee "vill méi séier" eng besser Balance tëschent de Restriktiounen an de Fräiheete fannen. "An do wier eng Impfflicht [...] eben hëllefräich", esou de Prof. Dr. Claude P. Muller.
Impfflicht géif Ophiewe vu Restriktiounen erméiglechen
Eng Majoritéit huet sech gëschter an der Chamber fir esou eng Impfflicht ausgeschwat, wéi se d'lescht Woch am Experten-Avis proposéiert gi war: also eng Impfflicht fir all Leit vun iwwer 50 Joer, souwéi fir Leit aus dem Gesondheets- a Fleegesecteur, an Acteuren aus de Rettungsservicer.
Déi geplangt partiell Impfflicht wäert awer net séier agefouert ginn. De Gesetzesprojet dierft eréischt an zwee bis dräi Méint virleien, wéi d'Justizministesch Sam Tanson am 100,7-Interview erkläert huet.
De Prof. Dr. Claude P. Muller mengt, datt eng Impfflicht trotzdeem hëllefräich wier: se géif eréischt dann ze spéit kommen, wann d'Omikron-Variant d'Populatioun schonn duerchseucht hätt, esou datt et eng Bevëlkerungsimmunitéit géif ginn.
Dës Immunitéit géif et engem erlabe Restriktiounen opzegi fir al Gewunnechten zeréck ze kréien. "Mee soulaang Omikron net einfach ouni Restriktiounen duerchlafe kann, geet dat net esou séier."
Wéini ass den Héichpunkt vun der Omikron-Well?
D'Omikron-Variant géif zu Lëtzebuerg nëmme lues viru goen, esou den Androck vum Prof. Dr. Claude P. Muller. Dat kéint mat der Disziplin vun der Bevëlkerung a mat gudden Immunverhältnisser ze dinn hunn.
Bis den Héichpunkt vun der Omikron-Well erreecht ass, kéint et deemno nach méi laang dauere wéi an anere Länner, esou den Expert.
Den däitsche Gesondheetsminister rechent bis Mëtt Februar mat e puer Honnertdausend Neiinfektioune pro Dag an Däitschland: et wier dovun auszegoen, datt d'Well Mëtt vum nächste Mount ongeféier hiren Héichpunkt wäert hunn, esou den SPD-Politiker Karl Lauterbach an der ZDF-Sendung "Markus Lanz".
Fraktiounszwang soll opgehuewe ginn
D'Consultatiounsdebatt vu gëschter an der Chamber wier eng "ganz gutt Debatt" gewiescht, bei där bal all d'Argumenter dofir wéi och dogéint op den Dësch komm sinn, fënnt de Prof. Dr. Claude P. Muller. Hie géif sech wënschen, datt ouni Fraktiounszwang iwwer e Gesetz fir d'Aféierung vun enger Impfflicht géif ofgestëmmt ginn.
Ob déi fënnef Experten - also d'Auteure vum wëssenschaftlechen Avis - d'Aféierung vun der partieller Impfflicht viru wäerte begleeden, dat wier eng Entscheedung vun der Regierung, esou de Prof. Dr. Claude P. Muller.