Verfassungsreform Bis elo wéineg Ënnerschrëfte fir ee Referendum
Nëmme wéineg Wieler waren an de leschte knapp zwou Wochen op hir Gemengen ënnerschreiwe fir d'Demande vum Comité d'initiative fir e Referendum iwwer d'Justiz-Kapitel vun der Verfassung ze ënnerstëtzen.
An deene fënnef populatiounsräichste Gemengen am Land goufe bis elo zesummen 370 Ënnerschrëfte gesammelt, war op Nofro hi gewuer ze ginn. Fir datt et zu engem Referendum kënnt, misste bis den 20. Dezember am Ganze 25.000 Ënnerschrëften an den 102 Gemengen zesumme gesammelt ginn.
- An der Stad Lëtzebuerg si bis elo 106 Ënnerschrëften zesumme komm, bei ronn 31.000 Leit op de Wielerlëschte fir d'Chamberwalen.
- 74 Ënnerschrëfte sinn et zu Esch-Uelzecht, dat bei ronn 12.000 Wieler.
- Zu Déifferdeng, Diddeleng a Péiteng sinn et 63, 52 respektiv 75 Ënnerschrëften, déi d'Demande z'ënnerstëtzen.
28 Wieler waren an der Gemeng Hesper ënnerschreiwen, 46 an der Gemeng Beetebuerg an 43 an der Gemeng Schëffleng.
An der Gemeng Waldbëlleg, aus där eng Rei Membere vum Comité d'initiative kommen, goufe bis elo 12 Ënnerschrëfte gesammelt, bei 1.133 ageschriwwene Wieler.
Méi zum Thema
Verfassungsreform: Wat ännert sech am Justiz-Kapitel?
Am Oktober hat d'Chamber fir en Deel vun der Verfassungsreform gestëmmt. Bis den 20. Dezember hunn ageschriwwe Wieler nach Zäit, fir ee Referendum anzefuerderen. Wat ännert sech am neien Text genee?
Demande fir e Referendum ka vun haut un ënnerschriwwe ginn
Vun haut u kann op der Gemeng d'Demande fir ee Referendum iwwer d'Verfassungsreform ënnerschriwwe ginn. 25.000 Ënnerschrëfte si bis den 20. Dezember néideg. Ee vun den Organisateure weist sech zouversiichtlech.
Verfassungsännerungen: Wéi kann et zu engem Referendum kommen?
Eng ëffentlech Petitioun fir e Verfassungsreferendum wäert an der Chamber debattéiert ginn, d'Parteie wäerte sech nach eemol zur Fro musse positionéieren. Ee Referendum kéint vum Parlament a vu Bierger declenchéiert ginn.
