Däitschland AstraZeneca an Däitschland: Vaccin non grata?

Net nëmmen hei zu Lëtzebuerg, mee och an Däitschland gëtt den Impfstoff vun AstraZeneca vun haut un nees gesprëtzt, nodeems d'Europäesch Medikamentenagence EMA gëschter gréng Luucht ginn hat. D'Confiance an de Vaccin dierft awer duerch de Stopp staark gelidden hunn an riskéiert elo d'Impfcampagne nach méi zeréckzewerfen. Dofir kommen haut d'Bundesregierung an d'Bundeslänner zesummen fir op engem Impfsommet Léisungen ze fannen.

Max tholl (Berlin) / cbi

Impfzentrum Berlin
Gëtt an Zukunft an Däitschland just nach an Impfzentere geimpft? Foto: picture alliance/dpa | Christophe Gateau

Fir d'éischt wollt den däitsche Gesondheetsminister Jens Spahn um Vaccin AstraZeneca festhalen, leschte Méindeg hat awer och hien den Impfstoff temporär aus dem Verkéier gezunn. Vun haut un ass AstraZeneca awer nees am Asaz.

Een Imageschued duerch dësen Hin an Hier kann de Jens Spahn awer net erkennen, villméi ass hien iwwerzeegt, datt de Virfall d'Vertraue vun de Léit an de Vaccin kéint stäerken. Et hätt ee gewisen, datt een alles suergfälteg iwwerpréift an transparent kommunizéiert, sot hien de Moien an der Bundespressekonferenz. Elo misst een de Retard schnell nohuelen, deen an de leschte véier Deeg entstane wier.

Impfgipfel beréit iwwer weider Demarchen

Op esou vill Optimismus wäert de Gesondheetsminister haut beim sougenannten Impfgipfel awer wuel net stoussen. Well an der Regierung an ënner de Bundeslänner ass d'Angscht grouss, datt AstraZeneca elo definitiv en Vaccin non grata ass an d'Impfcampagne weiderhin nëmme lues verlafe wäert.

Dofir soll beim Sommet och diskutéiert ginn, wéini d'Hausdoktere vollëmfänglech mat an d'Impfstrategie agebonne ginn a wéi een u méi Vaccin ka kommen. De Berliner Buergermeeschter Michael Müller sot, et misst een an der EU iwwer en Exportstopp nodenken, et kéint net sinn, datt ee selwer net genuch Impfstoff hätt an awer Länner géif beliwweren, déi scho méi wäit sinn an hirer Impfcampagne.

Doktere solle mat agebonne ginn

Och de bayresche Ministerpresident Markus Söder ënnerstëtzt dës Fuerderung a mécht sech dofir staark, de russesche Vaccin Sputnik V sou schnell wéi méiglech zouzeloossen. Mat Bléck op AstraZeneca, sot hien, et misst alles verimpft ginn, wat ka verimpft ginn.

Besonnesch d'Hausdoktere kéinten hei eng wichteg Roll spillen, well si individuell op hier Patiente kënnen ofstëmmen, wie mat AstraZeneca soll geimpft ginn. Eigentlech war decidéiert ginn, datt spéitst den 19. Abrëll sollt ugefaange ginn an de Cabinets medicaux ze vaccinéieren, et ass awer ongewëss, ob dësen Datum kann agehale ginn.

D'Kanzlerin Merkel sot am Virfeld, d'Erwaardunge missten un d'Realitéit ugepasst ginn, an déi wier eben, datt et nach net genuch Impfstoff gëtt. Den Deutscher Hausärzteverband huet awer ëmmer nees betount, datt een elo scho misst op d'Hausdokteren amplaz op Impfzentre setzen. Besonnesch AstraZeneca sollt an de Cabinets medicaux agesat ginn, well en méi einfach ze stockéieren ass. D'Mësstrauen an de Vaccin kéint dëse Plang awer negativ beaflossen.

Inzidenz klëmmt an Däitschland

Eng Léisung gëtt dréngend gebraucht, well d'Inzidenzzuel weiderhin staark klëmmt. Se steet elo schonn bei 95,6, den SPD-Gesondheetsexpert Karl Lauterbach huet haut an der Bundespressekonferenz prognostizéiert, datt se Mëtt Abrëll schonn op 200 kéint klammen.

Den aktuelle Lockdown wier dowéinst alternativlos. E Méindeg steet déi nächst Ministerpresidentekonferenz un, wou déi nächst Schrëtt sollen diskutéiert ginn.

An der Mediathéik:

Aktuelles / / radio 100,7
Lauschteren

Méi zum Thema

COVID-19 VACCIN
CORONA-PANDEMIE

Wéi sécher ass den Impfstoff AstraZeneca a soll virun domat geimpft ginn? Déi Fro beschäftegt den Ament d'Gesondheetsministeren an der ganzer EU. D'Länner zéie ganz ënnerschiddlech Konsequenzen.

AstraZeneca
Impfstrategie

Nodeems verschidden EU-Länner d'Impfung mat AstraZeneca ausgesat hunn, schléisst Lëtzebuerg sech dëser Positioun un. Et géif sech heibäi ëm eng Precautiounsmesure handelen, preziséiert d'Regierung.

Impfen
Impfen

An Däitschland leeft d'Impfen net esou séier wéi erhofft. Den Hausdokteren no ass dat, well si nach net matabezunn goufen. Dofir fuerdere si elo, d'Impfzentren zouzemaachen an d'Vaccinatioune bei den Hausdokteren duerchzeféieren.

AstraZeneca
Impfcampagne

D'Santé zitt 4.800 Impfdosisse vun AstraZeneca virsiichtshallwer aus dem Verkéier. Et handelt sech dobäi ëm eng Precautiounsmesure, nodeems an Dänemark e puer Fäll vun Thrombosen no Impfunge mat AstraZeneca opgedaucht sinn.

Programm

Net verpassen

  • Annonce: Recherche d'un chef de la programmation

    Gebai vum radio 100,7

    L'Etablissement de Radiodiffusion Socioculturelle, opérateur de la radio de service public radio 100,7, recherche 1 chef de la programmation (m/f) pour contrat à durée indéterminée et à temps plein.

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen