Krisesëtzung EU-Ausseministeren Asselborn: EU soll eng Zort Helsinki-Prozess lancéieren

Am Konflikt mam Iran kéint d'EU sech abréngen, andeem een eng Zort Sécherheetskonferenz mat den involvéierte Parteie lancéiert, seet den Ausseminister Jean Asselborn um Bord vun der Krisesëtzung zu Bréissel.

Danièle Weber (Bréissel) / cbi

De Jean Asselborn um Bord vum Treffe vun den EU-Ausseminister
De Jean Asselborn um Bord vum Treffe vun den EU-Ausseminister Foto: European Union

Nom tragesche Fligeraccident am Iran muss den Iran op Transparenz setzen, an et muss eng Enquête gemaach ginn, sou de Jean Asselborn am 100,7-Interview.

D'EU kéint ee Prozess lancéieren, wéi deen, deen tëschent 1973 an 1975 wärend der Konferenz fir Sécherheet an Zesummenaarbecht an Europa geféiert gouf, fir eng Léisung am Ost-West-Konflikt ze fannen. "D'EU kéint sech abréngen, fir datt sech d'Länner um Golf mat den USA a Russland un een Dësch setzen", sou de Jean Asselborn. Et kéint op deem Wee versicht ginn, de Konflikt um diplomatesche Wee ze léisen. "Dat ass an där Regioun immens schwéier, mee ech mengen, datt mir als Europäer do kéinten eisen Apport ginn."

Den Irak sech net selwer iwwerloossen

De Lëtzebuerger Ausseminister huet sech och dogéint ausgeschwat, datt de Westen sech aus dem Irak zeréckzitt. Dat wier eng vun deene wichtegste Konditiounen dofir, datt den "Irak net den Theater vun deene militäreschen Ausenanersetzunge gëtt, ënnersträicht de Jean Asselborn.

"Et ass un eis als EU oder als NATO mat ze hëllefen dono ze kucken, datt Sécherheetskräften am Irak ausgebilt ginn, fir d'Stabilitéit vum Irak kënnen ze garantéieren".

Um Atom-Accord mam Iran festhalen

De Lëtzebuerger Chefdiplomat ass iwwerdeems dofir, datt d'EU um Atom-Accord mam Iran festhält. "Et geet drëm, datt den Iran net dierf Atomwaffe kréien."

D'EU hätt 13 Joer gebraucht, fir den Accord op d'Been ze setzen. Elo sollt dat net "futti gemaach ginn".

"Mir mussen dem Iran kloer soen, datt si net op de Wee vun enger Uran-Uräicherung kënne goen".

Op d'Fro, ob d'EU, nodeems den Iran annoncéiert hat, sech net wieder un d'Konditiounen ze halen, hir Positioun ännere sollt, sot de Jean Asselborn: "Et gëtt am Accord ee Mechanismus, deen ageschalt gëtt, wann d'Bedéngungen net erfëllt ginn." Wier datt de Fall, géif de Sécherheetsrot vun de Vereenten Natiounen ageschalt ginn.

D'iranesch Aussepolitik an och déi vun de Mënscherechter wier "katastrophal", sou de Jean Asselborn. Den Atom-Deal wier awer e Mëttel gewiescht, fir an deem spezielle Beräich Afloss ze huelen op déi iranesch Politik an ze verhënneren, datt d'Land eng Atombomm huet.

Libyen: d'EU soll net eleng d'Konsequenzen droen

Wat d'Situatioun a Libyen ugeet misst ee verhënneren, datt Russland an d'Tierkei iwwer de Kapp vun den Europäer ewech Solutioune fannen, bei deene "mir herno als Europäer d'Erausfuerderunge vun der Migratioun droe mussen".

Hei misst d'EU kloer maachen, datt dës Problemer net eleng op hire Schëllere kënnen ausgedroe ginn.


De ganzen Interview mam Jean Asselborn lauschteren

Méi zum Thema

François Bausch
Politesch Reaktiounen op US-Attack

De Lëtzebuerger Verteidegungsminister zweiwelt drun, datt d'US-Arméi dat internationaalt Recht respektéiert huet, wéi se den iranesche Generol Qasem Soleimani ëmbruecht huet.

Net verpassen

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen