Kanada Asbestos wëllt sech en neien Image ginn

Den Asaz vun Asbest ass zu Lëtzebuerg zanter 20 Joer verbueden, well e kriibserreegend ass. Kanada huet en anert Verhältnes zum déidleche Mineral. D'Land war laang weltwäit ee vun den Haapt-Exportateure vun Asbest. An der Provënz Québec gëtt et dowéinst souguer eng Stad, déi Asbestos heescht. Déi wëllt sech elo awer ëmbenennen. Eise Kanada-Korrespondent Léonardo Kahn huet mam Buergermeeschter vun Asbestos iwwer den Imagewiessel geschwat.

Léonardo Kahn (Kanada) / cbi

Asbestos
Asbestos wëllt sech a Val-des-Sources ëmbenennen

Breet Stroossen, Bungalowen, eng déck Couche Schnéi: Asbestos schéngt eng kanadesch Stad ze si wéi vill anerer. Ausser, datt sech hei alles ëm den Asbest dréit.

Zu Asbestos gëtt et eng vun den eelsten Asbestminne weltwäit. Se huet hei laang d'Liewe bestëmmt. Dat huet sech 2012 geännert: d'Minn huet missen zoumaachen an zënterhier stécht d'Stad an enger Zort Identitéitskris. No laangem Hin an Hier hunn d'Gemengeresponsabel entscheet, datt Asbestos elo "Val-des-Sources" soll heeschen.

An enger Stad, wou de Gros vun der Bevëlkerung net un de Risk vum Asbest gleeft, mécht sech de Buergermeeschter Hugues Grimard domadder net grad beléift. Den Haaptgrond fir den Imagewiessel wier d'Angscht virum Asbest an der Welt, et hätt een eng weltwäit Phobie net kënnen änneren. Dofir wéilt een den Numm änneren.

Dat wäisst Gold

De 49 Joer ale Politiker gleeft net wierklech un déi gesondheetlech Risike vum Asbest. Dobäi ass d'Longekrankheet "Asbestose" haut nach a Kanada déi heefegste Beruffskrankheet. D'kanadesch Regierung huet réischt 2018 en allgemenge Verbuet entscheet: als lescht westlech Industrienatioun.

Asbest gouf fréier als wäisst Gold bezeechent. Déi mineralesch Naturfaser ass immens bestänneg, robust a bëlleg - a gouf dowéinst am 20. Joerhonnert vill an der Industrie benotzt. Eenzegen Hoken: si ass kriibserreegend.

Hautdesdaags huet d'Mineral e schlechte Ruff, bal iwwerall - ausser zu Asbestos. D'Bewunner hei sinn immens houfreg op hir Minnevergaangenheet. Dowéinst wollten d'Leit den Numm och bäibehalen, wéi de Buergermeeschter erkläert. Et wier eng ganz emotional Decisioun gewiescht, mee et misst een dat rationell betruechten an no vir kucken.

"Wann ee sech vum Numm vun enger Stad trennt, trennt ee sech net vu senger Vergaangenheet. Mir sinn houfreg op eis Geschicht. Mee fir eis Zukunft kënnen ze gestalten, musse mir den Numm änneren."

Eng strategesch Decisioun

Hanner dem Changement vun "Asbesots" op "Val-des-Sources" stécht also virun Allem eng ekonomesch Strategie mam Argument: et géifen net vill Investisseure ginn, déi an eng Stad wëlle kommen, där hiren Numm no bëllege Baumaterialer a Longekriibs kléngt.

Un hirer Minnenindustrie wëllt d'Stad festhalen. Niewent Asbest ass am Buedem och Magnesium ze fannen, e Mineral, dee fir Batterien an Elektroautoe ka genotzt ginn. Dës Geleeënheet wëllt sech de Buergermeeschter Grimard net entgoe loossen. Aktuell géif dru geschafft gi fir Offäll vum Mineralofbau nees kënne weiderverwäert ze ginn, an dat a ganz Kanada.

D'Minennindustrie huet allerdéngs gesondheetlech Konsequenzen: och wann elo no Magnesium amplaz vun Asbest gegruewe gëtt, bleift d'Loft kontaminéiert. De kanadesche Staat huet seng Entscheedung allerdéngs scho geholl a 45 Milliounen kanadesch Dollar an de Projet investéiert. "Val-des-Sources" huet sech also nach net ganz vum Asbest getrennt.

An der Mediathéik:

Aktuelles / / radio 100,7
Lauschteren

Méi zum Thema

Kanada - Spurensuche am Yukon
Natur-Doku

An der Rou vun der Wildnis ass den experimentellen Archeolog Kim Pasche op op de Spuere vun eise Virfaren, op der Sich nom Ursprong vun eiser moderner Gesellschaft. D'Lara Bousch stellt d'Natur-Doku vir.

Vancouver
Uechter d'Welt

Kanada. Do denkt een u wonnerschéin Natur, ee charismatesche Premier a flott, modern Stied - eng Zort USA mat franséischem Flair. Dat zweetgréisste Land op der Welt huet no baussen een immens positiven Image. Zu Recht?

Programm

Net verpassen

  • Nei Serie: poesik

    jr-korpa-GQeSfSWmXvI-unsplash.jpg

    Dem Jean Portante seng nei Serie stellt Kompositiounen a Lidder vir, Wierder a Kläng, déi der Weltpoesie eng nei Dimensioun ginn a se dem Publikum méi no bruecht hunn.

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen