De President vum ACL ass deemno ganz zefridden, well Fuerderunge vun der Asbl mat hiren iwwer 180.000 Memberen a verschiddene Wahlprogrammer erëmzefanne sinn.
"Et ass natierlech ëmmer nëmmen e Programm. Et muss ee kucken, wéi dat duerno an der Realitéit ass." Et géif awer och eng Rei Dispositioune ginn, mat deenen den ACL manner d'Accord ass.
Dozou gehéiert d'Iddi fir méi eng héich Besteierung vu Verbrennungsmotoren: déi Lénk wëllen ëmweltschiedlech Gefierer, wéi den Diesel, méi staark besteieren.
Statistiken iwwer Accidenter feele weider
Bei der ACL-Fuerderung no enger Datebank mat Detailer iwwer d'Ursaache vun den Accidenter hei am Land, hätten et an de leschte Jore praktesch keng Fortschrëtter ginn, bedauert den Yves Wagner.
Et hätt ee mat der aktueller Regierung dacks driwwer geschwat, d'Propositioune wieren eigentlech och positiv opgeholl ginn, konkret wier awer näischt geschitt. Fir den ACL bleift dës Propos awer weider eng vun den Haapt-Revendicatiounen.
ACL fir Ausbau vun Autobunnen op dräi Spuren
Den Automobilclub ass fir een dräispuregen Ausbau vu bestëmmten Deeler vun den Autobunnen. Hien ass sech bewosst, datt dat e kontroverst Thema wier, dat awer nëmmen, well et schlecht presentéiert wier.
"Mir gesinn dat am ACL mat eisen Depannagen: do wou mir ganz grouss Problemer hunn, dat ass eben op Autobunnen, wou mir keen Accès hunn, wann en Accident passéiert, fir den Depannage ze maachen. An de Stau kënnt ganz oft doduerch, datt déi Autoen net séier kënne geraumt ginn."
Dowéinst verlaangt den ACL méi breet Autobunnen, fir méi séier a méi sécher Depannagë kënnen ze maachen.
"Gutt Aarbechtsklima"
Wat den Automobilclub mat sengen 150 Mataarbechter ugeet, huet de President ënnerstrach, datt den Aarbechtsklima de Moment gutt wier. Der Asbl géif et och finanziell erëm gutt goen, no Restrukturéierungen, Aspuerungen a wéinst nach ëmmer villen neie Memberen. Den Automobilclub plangt och fir nei Standbeen am Süden an am Norde vum Land opzebauen.
ACL ass fir d'Méiglechkeet vu Sammelkloen
Den Automobilclub ass iwwregens och dofir, datt am Lëtzebuerger Recht d'Méiglechkeet vu Sammelkloe geschaaft gëtt. An deene meeschten europäesche Länner géif et dës Méiglechkeet ginn, esou den Yves Wagner. An an deene meeschte Wahlprogrammer stéing, datt een an dës Richtung wéilt goen.