Um Resultat géifen och déi méi positiv Äntwerten op aner Froe wéi "sidd Dir houfreg bei der Post ze schaffen?" oder "gitt Dir gär moies op d'Aarbecht" näischt änneren. Iwweregens gesäit de Gilbert Goergen doran net onbedéngt e Widdersproch.
"E gudden Deel vun de Leit, déi op der Post schaffen, sinn nach Fonctionnaire oder Employé public, an déi hunn eng aner Verbonnenheet (mam Betrib)."
Wann ee sou laang an engem Betrib schafft, da géif een op esou Froen anescht äntwerten, wéi wann een nach net sou laang schafft, sou de Gilbert Goergen.
"Wann et awer elo ëm mäi Kand geet, da géif ech vläicht soen, orientéier dech emol an eng aner Richtung. Well ech och elo e bësse gesi wéi et funktionéiert, wéi d'Zukunft ausgesäit a wéi mer matenee schaffen."
War d'Ëmfro net anonym?
De Gilbert Goergen schléisst och net aus, datt d'Äntwerten zum Deel drop zréckzeféiere sinn, datt d'Ëmfro guer net esou anonym war, wéi behaapt gouf.
"Wann et heescht anonym, an du kriss dann awer nach eemol dräi, véier Maile fir dech drun ze erënneren, datt s de nach näischt geäntwert hues, oder d'Leit ginn duerno geruff a gefrot, firwat se dann esou an esou geäntwert hunn, da si mer awer net méi an der Anonymitéit. An dat ass e richtege Problem."