Do géif dru geduecht ginn, eng Fusiouns-Kommissioun ze schafen, déi hëllefe soll dofir ze suergen, datt déi zwee Partner lues a lues zesummewuessen. De Buergermeeschter Paul Engel ass sech awer bewosst, datt dat net vun haut op muer geet.
"Dat ass eng Fro vun der Zäit. An och vum Gefill a vum Wuelbefannen. Wann d'Leit sech wuel fillen, ass de Prozess vill méi séier ze realiséieren. Par conter, wär et net gutt wann d'Leit ufänken onzefridden ze sinn a soen, nondidjëss, virdru war et besser."
Et misst een de Leit dofir e Wuelgefill vermëttelen an d'Vertraue schafen, datt déi Gemengeresponsabel hirt Bescht fir d'Gemeng maachen.
Zil: Méi wéi just eng administrativ Zesummenaarbecht
De Paul Engel seet, datt d'Erausfuerderung elo wier fir dofir ze suergen, datt aus där Fusioun méi gëtt ewéi just eng administrativ Zesummenaarbecht vun zwou fréiere Gemengen ënnert engem neien Numm. Am Fall vu Groussbus-Wal géif d'Saach doduerch erliichtert ginn, datt déi zwee Partner, déi zesummegaange sinn, mat jee ronn 1.100 Awunner d'selwecht grouss waren.
Dat géif sech och an der Zesummesetzung vum Gemengerot weisen, dee sech aus sechs Conseilleren aus Grousbus a sechs aus Wal zesummesetzt.
