Den Direkter vu Paul Wurth preziséiert, datt souwuel an der Ukrain, wéi och a Russland nach Mataarbechter wieren, mee déi Lëtzebuerger Mataarbechter wiere mëttlerweil zeréck.
"Mataarbechter aus der Ukrain, ukrainesch Fraen, hu mer heihinner kënne rapatriéieren. Mee sur place ginn et nach Mataarbechter, souwuel vun der Firma Paul Wurth, wéi och vum Mammenhaus SMS."
De Grupp SMS, zu deem Paul Wurth zanter dem leschte Joer gehéiert, hätt iwwer 1.000 haaptsächlech russesch Mataarbechter, déi a Russland beschäftegt wieren.
De Georges Rassel erkläert, déi Mataarbechter géife sech ëm déi sécherheetstechnesch Maintenance vum Equipement këmmeren, dat an der Vergaangenheet a Russland geliwwert gouf.
Eng limitéiert Maintenance gëtt nach assuréiert
Als Fournisseur wier een hei deelweis u laangfristeg Verträg gebonnen, déi een net einfach kéint ignoréieren, betount den Direkter vu Paul Wurth:
"Dat Eenzegt, wat mer elo nach maachen, dann sinn am Fong lokal esou sécherheetstechnesch Interventiounen. Fir sécher ze stellen, datt Deeler oder Ekipementer, déi mer geliwwert hunn, datt déi nach dohanne kënne funktionéieren. Datt do net Mënschen zu Schued kommen. An dofir hu mer nach lokal Leit sur place, deene mer da quasi ferngesteiert vun hei soen, wat se nach solle maachen."
Wann de Betrib dat net géif maachen, da géif e riskéieren vu senge russesche Cliente viru Geriicht ugesicht ze ginn.
