Invité vum Daga Agence Immobilière Sociale: "Et ass schwéier eist Zil ze erfëllen"
Weinst den héije Wunnengspraisser, kritt d'Agence Immobilière sociale et ëmmer méi schwéier hir Missioun ze erfëllen, sou den Direkter vun der AIS, de Gilles Hempel. D'Zil vu senger Agence ass et am Fong Leit, déi sozial a finanziell Schwieregkeeten hunn ze encadréieren, bis se Uschloss um reguläre Wunnengsmarché fannen. Dat géif wéinst den héije Präisser awer ëmmer méi schwiereg ginn, esou de Gilles Hempel. A sengen Ae missten däitlech méi Sozialwunnenge gebaut gi fir de Problem ze léisen.
An anere Länner géif de soziale Wunnengsbau bis zu 30 Prozent ausmaachen, zu Lëtzebuerg wieren dat - wat de Locatif ubelaangt - knapps zwee Prozent.
"Also do gesäit een einfach, datt dat net duergeet, an datt dat massiv muss opgestockt ginn."
Nieft dem Bau vun eegene Sozialwunnengen, dierft de Staat och net zécke fir de Marché méi staark ze reguléieren: Eng Deckelung vun de Terrains- a de Loyerspräisser dierft deemno keen Tabu sinn, esou de Gilles Hempel.
Méi Sozialwunnenge bauen an der manner verkafen
Bei der Agence Immobilière Sociale gëtt et am Moment eng Waardelëscht vu ronn 1.000 Leit, déi eng Sozialwunneng wëlle kréien. D'Leit géifen och ëmmer méi laang an de Wunnenge vun der AIS bleiwen.
"Leit, déi u sech hire Projet ofgeschloss hunn, déi Aarbecht fonnt hunn, déi Formatioune gemaach hunn, déi hir Scholden zréckbezuelt hunn, déi u sech och elo guer keen Accompagnement an dem Sënn géife brauchen, déi kommen net fort, einfach well um normale Marché keng adequat Wunnengen do sinn."
De Gilles Hempel fuedert dofir, datt de Staat méi Sozialwunnenge baut, an datt déi Wunnengen dann och op Dauer an ëffentlecher Hand bleiwen. Am Moment géifen déi staatlech Acteuren ze vill abordabel Wunnenge verkafen, esou den AIS-Direkter.
An der Mediathéik:
LauschterenMéi zum Thema
Meenung
Ouni Wunnraum gëtt et och keen "abordabele" Wunnraum
De Wunnengsbauminister versprécht "abordabel" Wunnengen ze schafen. Déi Demonstranten, déi dofir op d'Strooss ginn, sollen da wuel mengen, si wiere bei deene Glécklechen, déi esou eng fannen. De Jean-Jacques Rommes zweiwelt dorun.
Riicht Eraus
"Net d'Demande stimuléieren, mee d'Offer"
De Logementsminister Henri Kox wëll dofir suergen, datt d'ëffentlech Hand méi abordabel Wunnenge kann zur Verfügung stellen. Steierlech Avantagë fir privat Immobilieninvestisseure solle reduzéiert ginn.
