Omega 90 "No der Kris muss vill Trauerbewältegung gemaach ginn"
Palliativ Fleeg an Traueraarbecht sinn d'Haaptaktivitéite vun der Associatioun Omega 90. An dat zënter 30 Joer. Fir d'Trauerbewältegung no engem Stierffall gëtt et eng grouss Demande an no der Coronakris weisen d'Demanden nach no uewen.
Um Héichpunkt vun der Coronakris am Fréijoer ware vill Leit onglécklech datt se e Familljemember, deen an enger Institutioun um Stierwe louch, net begleede konnten, seet d'Diane Dhur vun Omega 90. Vill Leit hätte sech do mat der Associatioun a Kontakt gesat, fir en oppent Ouer ze fannen. "Mir hunn an de leschte Wochen eng Augmentatioun vun Demanden op Hëllef bei der Trauerbewältegung kritt", seet d'Diane Dhur. Andeems d'Leit hier Verstuerwen net konnte begleeden, géif hinnen e Stéck an hirer Trauerveraarbechtung feelen, dat misst elo opgeschafft ginn.
Doheem stierwen
D'Associatioun weist an hirem Joresrapport 2019 drop hin, datt vill Leit doheem wéilte stierwen, wat awer dacks net méiglech wier. Dat aus diverse materielle Grënn, oder och, well d'Familljemembere sech mat där Situatioun iwwerfuerdert spieren. Do misst een dru schaffen, seet d'Diane Dhur.
Trauerwaliss fir Kanner
D'Associatioun huet d'lescht Joer de Projet vun der Trauerwallis fir Kanner lancéiert. Heimat gi si zum Beispill a Schoulen. "D'Kanner ginn hei altersgerecht geleiert hier Trauer ze verschaffen", seet d'Diane Dhur.
D'Associatioun huet d'lescht Joer 4.150 Berodungsstonnen an der Traueraarbecht gemaach. Ronn 70 Benevollen hu sech un dëser Aarbecht bedeelegt.
Méi zum Thema
"Et kann de Leit un eppes feelen, fir Agressioun ofzebauen"
De Confinement huet villes geännert. A ville Fäll huet dat och psychologesch Konsequenze mat sech bruecht. An engem rezent publizéierte Buch geet et ënner anerem ëm Aggressiounen a Roserei an der Isolatioun.
Psychologesch Konsequenze vun der Kris
Vill Leit, och Kanner a Jugendlecher, leide psychesch ënner där aktueller Situatioun vum Confinement, seet den Dr. Jean-Marc Cloos. Hien hofft, datt bei der Ouverture vun de Schoulen alles richteg gemaach gëtt.
