De 14. August solle Munneref, Ettelbréck an d'Luxexpo zou goen, eng Woch drop wäert den Impfzenter um Findel zoumaachen. Just Esch an de Lampertsbierg bleiwen dann nach op.
Dofir gëtt dann awer och an d'Dokteschpraxisse geimpft: 200 Cabineten hätte bis ewell hir Bereetschaft signaliséiert, fir do matzemaachen, sou de Luc Feller. Hie wier iwwerzeegt, dass weiderer nokéimen.
Kräizimpfung: Delai bleift bestoen
Leit, déi eng éischt Dosis AstraZeneca kruten, kënne jo zanter dem leschte Freideg fir eng Kräizimpfung optéieren, also déi 2. Dosis AstraZeneca duerch en mRNA-Impfstoff ersetzen. 57 Prozent vun deenen, déi a Fro koumen, hätten dat bis elo gemaach, sot de Luc Feller.
Wat den Delai tëscht éischter an zweeter Impfung ubelaangt, ännert awer näischt. De Conseil supérieur des maladies infectieuses huet a sengem Avis gesot, datt déi zweet Dosis tëschent der véierter an der 12. Woch gemaach ka ginn, aktuell läit ee bei aacht Wochen, erkläert de Luc Feller.
"Dat heescht, mir halen deen Delai bäi, deen een och bei enger zweeter Dosis AstraZeneca hat. Ganz einfach, well mir vill vun deenen Dosissen, déi mer am Moment vu Pfizer a Moderna geliwwert kréien, datt mer déi fir déi zweet Impfung vun deene Leit brauchen, déi viru véier Woche mat Moderna oder Pfizer geimpft gi sinn."