Open Mind
Museken aus Westafrika, der Tierkei, Griichenland, Polen, Kuba, Palästina an aus Spunien, an all hu se eppes gemeinsam: en oppene Geescht! (fir Influenze vu baussen)
Traditionell griichesch Rhythmen, Rebetiko, kombinéiert mat psychedelesche Rock an Elektronica héiere mir bei der Kristi Stassinopoulou an dem Stathis Kalyviotis.
E jonke Meeschter um Balafon ass de Kanazoé. Hien a säin Orchester entdecke mir um Album “Tolonso”, wou d’Dobet Gnahoré Sängerin vun der Côte d’Ivoire an Duechter vum Perkussionist Boni Gnahoré, Gaaschtinvité ass.
D’Rokia Traoré aus dem Mali lauschtere mir vun hirem éischten Album “Mouneïssa” aus dem Joer 1998. En Disk, dee mat der Ënnerstëtzung vum Ali Farka Touré, der Maison de la Culture d’Amiens an dem Label Bleu och an eise Géigende konnt verëffentlecht ginn. D’Joer virdru koum en am Mali eraus.
D’Touareg vun Tinariwen sinn derbäi mat hirem 8. Album “Amadjar”, op deem eng Rëtsch Gaaschtinvitéen ze héiere sinn. Amadjar bedeit op Tamashek souvill wéi de frieme Reesender. Den Album erzielt vum Gefill e Friemen a sengem eegene Land ze sinn.
“Carry the Earth” vum Trio Joubran zesumme mam Roger Waters vu Pink Floyd ass en engagéiert Lidd. De Grupp aus Palästina dediéiert et all deenen, déi fir hiert Land gestuerwe sinn, an am speziellen ass et eng Referenz un déi 4 jonk Cousinen, déi a Gaza ëmbruecht goufen. An och de Poet Mahmoud Darwish kënnt bei dësem Lidd zu Wuert.
D’Bridder Alejandro a Víctor Hernández sinn agetaucht an d’Traditioune vun hirer Heemecht Murcia fir eng eenzegaarteg Musek ze schafen, an där déi analog Synthien d’Kastagnetten an d’Laut begéinen. Den Duo nennt sech Maestro Espada, dréckt sech am lokalen Akzent aus an duerchwandert de Repertoire vun de Cuadrillas murcianas, dës traditionell Gruppe vu Murcia. Dëse Folklor gëtt net als eng Reliquie ugesinn, mee als Inspiratiounsquell. Immens inspiréiert an inspiréierend! Dem Produzent Raül Refree säin Touch spillt hei sécherlech eng ganz wichteg Roll …
Playlist:
1. Ignace de Souza & The Melody Aces - Asaw Fofor - African Scream Contest 2
2. Kristi Stassinopoulou & Stathis Kalyviotis - Ouden Oida - Rough Guide to Women of the World
3. Chłopcy Kontra Basia - The Supper - Brexit Blues
4. Kanazoé Orkestra - Djoroko (feat. Dobet Gnahoré) - Tolonso
5. Rokia Traoré - Laidu - Putumayo Presents African Café
6. Alfredo Rodriguez & Pedrito Martinez - Africa - Duologue
7. Tinariwen - Wartilla (feat. Warren Ellis & Stephen O'Malley) - Amadjar
8. Tinariwen - Iklam Dglour (feat. Warren Ellis & Rodolphe Burger) - Amadjar
9. Coşkun Karademir - Rüzgar - Öz
10. Le Trio Joubran - Carry the Earth (feat. Roger Waters) - The Long March
11. Maestro Espada - Carriles - Maestro Espada
12. Maestro Espada - Granaíco - Maestro Espada