Deepnude-Apps dinn, mat KI, ugedoe Persounen op Fotoen d’Kleeder aus a weise si dann op dëse gefälschte Fotoe plakeg. Biller, bei deenen een net gesäit, datt se net echt sinn, an datt et déi Foto ni gouf. De Jeff Kaufmann (Bee Secure) erkläert, firwat dat esou geféierlech ass: Betraffener verléieren d‘Kontroll iwwer hiert Bild, Inhalter kënnen ouni Zoustëmmung verbreet ginn a féieren dacks zu Schimt an Angscht oder staarkem Stress.
Bee Secure Radaren no soen 42 Prozent vun de 12- bis 16-Järegen, datt Jonker vum selwechten Alter heiansdo intim Fotoen oder Videoe vu sech verschécken. Bei de 17- bis 30-Järege sinn et esouguer 76 Prozent, déi esou Inhalter kréien. Dat weist, wéi present dëst Theema am Alldag ass.
Eng aktuell Etude aus der Belsch weist, datt méi wéi d’Hallschent vun de Jonken, déi Deep-Nude-Apps kennen, se schonn ausprobéiert hunn.
Bei Froen, Hëllef an Ënnerstëtzung adresséiert Iech un d’Ekipp vu Bee Secure. Et gëtt eng Helpline: 8002 12 34 oder online bee-secure.lu
