An eiser Welt, déi ëmmer méi komplex gëtt a sech technesch rasant weiderentwéckelt, brauche mir Mënsche mat kreativem Mindset. Kreativitéit ass net nëmmen exzentresche Kënschtler oder Genië mat Iddien, déi d’Welt veränneren, virbehalen. D’Kreativitéit léisst sech och am Alldag fannen. Sief et beim Kachen, wann een aus Reschter aus dem Frigo en neie Menu zaubert, oder wann een de Kanner virum Schlofegoen eng Gutt-Nuechtgeschicht erfanne muss. Kreativitéit besteet also net nëmmen am Zesummenhang mam Medium Konscht, mee och am Rapport mat Problemléisungen. E kreative Mënsch ass flexibel, sicht no neie Léisungsweeër an denkt dobäi och emol ëm den Eck.
Grad well mir net viraussoe kënnen, wéi d’Technologië sech veränneren a mat wéi engen Aarbechtsëmstänn mir an deenen nächste Joer konfrontéiert ginn, brauche mir Mënschen, déi sech all Situatioun upassen an iwwer den Horizont eraus denke kënnen: kreativ Leit. Fir der Generatioun vu muer ee gudde Start an d’Zukunft ze bidden, huet d'Kreativitéitsfërderung virun allem bei Kanner a Jugendlecher eng grouss Relevanz.
Kanner léieren am beschten, an deem si eppes mat alle Sënner erliewen a selwer Hand uleeën. Dofir bitt d'EwB de Raum an d’Méiglechkeeten hire Gestaltungsdrang a villfältege Workshoppen auszeliewen. Hei hunn och d’Elteren d’Méiglechkeet de kreativen Hutt unzedoen an niewent hire Kanner ze gestalten. Déi bescht Aart a Weis fir eppes ze fërdere bleift natierlech d'Virliewen an d’zesummen Erschafen.
“Am ZenArt Workshop, zum Beispill, fir Kanner vun 8 Joer un, kréien d'Famillen d’Material, Techniken an och denEncouragement gebuede fir sech fräi auszedrécken.
Am Billerbuchfigurenworkshop gi Famillen duerch de kreative Prozess geféiert fir hir eege Billerbuchfigur op d’Blat ze bréngen.
An eise Workshoppen hunn och d’Elteren d’Méiglechkeet de kreativen Hutt unzedoen a mat de Kanner ze gestalten.
Am Rhythmik Workshop fir Eltere mat Kanner tëschent 3 a 5 Joer sinn d’Kanner scho ganz fréi ageluede mat Beweegungen, Danz, Gesang oder mat Museksinstrumenter ze experimentéieren an hir eege kreativ Ausdrocksweis ze fannen.
An eise Lies- oder Filmmoienter vu 4 Joer u beschäftege mir eis mam Medium Buch a Film.
Mat der Leslie Fischbach, Mediepädagogin an der EwB (www.ewb.lu)
