Tëschent sechs Méint an zwee Joer sinn Puppelcher besonnesch oppe fir Neies ze entdecken, wat de Geschmaach ugeet, duerno awer kennt eng Phas, wou vill nei Liewensmëttele kennen ofgeleent ginn. Dohannert stécht dacks eng Zort Angscht virun Neiem, dat och Neophobie genannt, déi d'Evolutioun eis an d'Wéi geluecht huet. Dobäi kennt och, datt de Besoin vun Autonomie a Sécherheet nach dozou féiere kann, datt bis dohinner akzeptéiert Liewensmëttelen ënner enger anerer Form ofgeleent ginn.
"D'Phas, wou Kanner eng méi grouss Geschmaachs- an Gerochsempfindlechkeet opweisen, kann tëschent zwee an aacht Joer sinn",
seet de Laurent Baulesch vun der Ecole du Goût, mat Erklärungen a praktesche Rotschléi, wéi een déi Phas méi relax a mat Gedold duerchliewe kann.
Recommandatioun vum Laurent Baulesch:
Wat een net maache soll:
Verschidden Ausdréck, déi ze vill Luef, Drock, Zwang, oder Scholdgefiller beim Kand kënnen ausléisen, sinn ze vermeiden wéi z. B. "Super, datt s du alles giess hues", "Iess däi Geméis, dëst ass gesond an nëmmen domat gëss du grouss a staark" oder "Dessert gëtt et just, wann s du alles vum Teller giess hues".
Bléift konsequent: Kacht och net nëmmen dat, wat äert Kand sech wënscht: Dir decidéiert iwwer de Menü a setzt de Kader, Dir kënnt him awer de Choix loossen, z. B tëschent Mëllech a Jughurt, gebrode Gromperen oder Püree.
Am Spille léieren:
Stellt véier bis sechs bekannte Liewensmëttelen, déi äert Kand gutt kennt op den Dësch, loosst Äert Kand se mat all de Sënner erliewen (upaken, richen, e Stéck knabberen a schmaachen), duerno soll et seng Aen zoumaachen an da verstoppt Dir ee Liewensmëttel mat engem Becher. Loosst Äert Kand roden, wat fir een Liewensmëttel dra verstoppt ass.
