Den 10. Februar gouf vun de Vereenten Natiounen als internationale Dag vun de Leguminose festgeluecht. Eng Geleeënheet dës héichwäerteg Liewesmëttele méi genee ënner d'Lupp ze huelen: Weltwäit ginn et 18.000 Aarten an ënner Form vu Lënsen, Bounen, Kicherierbessen, Soja ... bilde se e Grondliewensmëttel fir vill Kulturen.
Leguminose sinn e ganz wichtegen Deel an der vegetarescher oder veganer Ernärung wéinst dem Eewäiss. Wéi eng wäertvoll Inhaltsstoffer hu se a wéi ee positiven Impakt hu se op eis Gesondheet?
"Si ginn och Légumes secs genannt an enthalen ënner konzentréierter Form op 100 g: 20-25 g Eewäiss, a sinn doduerch déi bescht planzlech Eewäissquell.
Derzou enthalen se 60 Prozent Kuelenhydrater, ganz wéineg Fett, 1-2Prozent,
an zeechnen sech och duerch en héije Gehalt un Magnesium, Eisen, Vitaminn B1 aus.
Duerch déi komplex Zesummesetzung an en héije Gehalt vun 11 Prozent, Ballaststoffer maache se séier sat, hëllefen den Cholesterolspigel erofsetzen an den Zockerspigel am Blutt ze moduléieren. Esou weisen rezent Etuden dass méi en héijen Konsum vun Leguminosen, a parallel derzou méi en niddregem Konsum vun Fleesch, e gudden Impakt op Virbeugung vun Iwwergewiicht, Häerzkreeslaferkrankungen an Diabetes huet",
seet d' Dieteticienne Lis Muller.
Dir kritt Rotschléi fir Leguminsoen op eng flott Aart a Weis an eisen Teller ze bréngen an esou e bessert Gläichgewiicht vun planzlechem Eewäiss an eiser Ernärung ze erreechen, wat och eiser Ëmwelt zegutt kënnt.
Tipp vum Lis Muller fir doheem ze maachen:
Humus:
Op Basis vun Käicher: Zitrounejus, Sesamkären oder nach méi einfach fäerdeg Sesamecrème, och Tahin genannt, mat kal Waasser, mixen, duerno 1 Bécks Kicherierbessen ofgeschott derbäi mixen an zum Schluss Olivenueleg, drënner mëschen. Ofschmaachen mat Peffer, wéineg Salz an Koriander oder Péiterséileg drënner mëschen.
Mayonnaise ouni Eeër:
Op Basis vu wäissen Bounen. Hei ginn gekachten wäiss Bounen mat Raps oder Olivenueleg , Moschtert, mat Gewierzer ofschmaachen a mixen, bis dat ganzt eng Konsistenz vun enger Mayonnaise huet.
Références:
Delorme, H. (2014) "Le répertoire des aliments et des saveurs" Flammarion
https://www.fao.org/pulses-2016/resources/fao-publications/fr/ (2016)
Mouquet-Rivier, V. & Amiot, M.-J. (2020) "Les légumineuses dans nos assiettes: que nous dit la science? Nutriments et composés bioactifs"
Unies, N. (février 2023). Journée internationale des légumineuses 10 février
