Wéi d'Judden nom Zweete Weltkrich vun de Vereenten Natiounen a vun de Britten en eegent onofhängegt Land am Noen Oste versprach kruten, dem haitegen Israel, waren d'Palestinenser, déi do gewunnt hunn, ausser sech vu Roserei, an hir moslemesch Glawensbridder weltwäit och. A wéi d'Israeli 1947 an engem Onofhängegkeetskrich géint eng Partie arabesch Länner hir Revendicatioun op dësen Territoire zementéiert hunn, ass d'Roserei an der arabescher Welt just nach méi schlëmm ginn.
Vill arabesch Länner hunn doropshin decidéiert d'Judden, déi nach bei hinne gelieft hunn, ze expulséieren. Wa si schonn elo hiert eegent Land hätten, da sollte si gefällegst och dohinner wunne goen, esou déi gängeg Iwwerleeung. Vum Maghreb iwwer Syrie bis hin zu der arabescher Hallefinsel: Dausende Judde sinn aus arabesche Länner a Richtung Israel geflücht, fir do en neit Liewen a Rou unzefänken. Jüddesch Communautéiten, déi et Joerhonnerten-laang do gouf, hunn op eemol opgehalen ze existéieren.
An déi westlech Groussmuechten, déi nach ëmmer e schlecht Gewëssen haten, d'Judden an Europa ënner dem Hitler am Stach gelooss ze hunn, hu gehollef fir dës Kéier e gréissert Bluttvergéissen ze evitéieren. Well tatsächlech goufen et Enn de 40er Joren, nom israeelesch-arabesche Krich, ëmmer méi gewalttäteg, an och déidlech, Iwwergrëff op Judden a moslemesche Länner, als Revanche fir d'Creatioun vum Staat Israel.
Ee Land, wou dat passéiert ass, war de Jemen, wou hautdesdaags nach ëmmer Biergerkrich ass. Zanter éiweg hunn am Jemen och Judde gelieft, wann och net vill. Am Joer 1948 hunn der 55.000 do gelieft, niewendrun am klenge brittesche Protektorat Aden, weider 8.000. Also gouf eng riseg Exfiltratioun organiséiert, et war d'Operatioun "Op de Flilleke vun Adler". De 16. November 1948, also haut virun 72 Joer, ass deen éischte Fliger voll mat jemenittesche Judden a Richtung Israel fortgeflunn.
