E bewossten Ëmgang mat Liewensmëttel geet schonn beim Akafen un. Vill Leit kafe méi wéi si brauchen. Et soll ee sech besser virum Akafen en Iwwerbléck iwwer seng Reserve verschafen, an iwwerleeën, wat ee wierklech verwäerte kann. Wichteg ass och, sech eng Akafslëscht ze maachen. Dat ass deen éischte Schrëtt fir manner Liewensmëttelverschwendung.
Duerno gëllt et, d'Iesswuere richteg ze lageren. Ënnerschiddlech Liewensmëttel hunn ënnerschiddlech Uspréch un Temperatur, Luucht oder och Loftfiichtegkeet.
Fir eng sécher Lagerung ass och eng propper Kiche wichteg, well ënner propper an hygienesche Bedéngunge feelt de Keimen d'Nahrungsgrondlag a se kënnen net wuessen. Nom Botze sollt een d'Liewensmëttel dann uschléissend nom Prinzip "First-in-first-out-Prinzip" erëm araumen. Dat heescht, datt déi Produkter mat dem kierzten Halbarkeetsdatum vir stinn. Esou verhënnert een, datt Reserven a Vergiess geroden. Awer och Produkter mat ofgelafem Halbarkeetsdatum kënnen nach ze genéisse sinn: kucken, richen a vläicht schmaache soll ee se op alle Fall.
Am stressege Beruffsalldag ass et schwiereg, all Dag frësch ze kachen. Fir seng Gesondheet lount et sech awer, frësch a selwer zoubereete Liewensmëttel ze iessen. Eng Méiglechkeet wier, sech z. B. eemol d'Woch méi Zäit ze huelen, an fir e puer Deeg virzekachen. Am beschte Fall kann een d'Kanner mat abannen. Dat gemeinsaamt Fillen, Richen a Schmaache vun den Liewensmëttel beim gemeinsame Kachen leet bei de Kanner e Grondsteen fir e liewenslaangen, bewossten Ëmgang mat Liewensmëttel.
