Déjà Vu
Jefferson Airplane - Volunteers
Mam Album "Surrealistic Pillow" an den zwee Single-Hits "Somebody To Love" a "White Rabbit" huet Jefferson Airplane zanter 1967 Erfolleg: de Sound vun der US-Westcoast ass zu där Zäit gefrot an d'Band ronderëm déi charismatesch Sängerin Grace Slick hat d'Lat héich geluecht fir déi nächst Produktiounen.
Besonnesch de fënneften Album "Volunteers" - den Album gëtt och alt emol mam Titel "Volunteers of America" bezeechent - confirméiert de quasi Kultstatus vun der Formatioun. Et ass alles dran, wat ugesot ass: politesch engagéiert Texter, acid Aflëss iwwer de ganzen Album verstreet, direkt Sprooch, exzellente Gittaresound, laang Live-Versioune vun de Lidder.
Den Album kënnt bei RCA Victor eraus - de leschte Release bei där Plackefirma, duerno publizéiert d'Band um eegene Label Grunt. Den Titelsong ass e kuerzen Anti-Krich-Song ... matzen am amerikanesche Vietnam-Trauma. D'Kompositioun "Wooden Ships" gëtt méi spéit ee vun de groussen Hits vu Crosby, Stills, Nash & Young.
Presentéiert vum Fred Medernach