Bis den 21. Abrëll gëtt u verschiddenen Zuchstrecke geschafft. Dräi Zuchlinne wäerten dofir iwwer d’ Ouschtervakanz net wéi gewinnt operéieren. Déi follgend Linne si betraff:
- Lëtzebuerg - Ettelbréck - Ëlwen - Gouvy
- Lëtzebuerg - Klengbetten- Arel
- Lëtzebuerg - Beetebuerg
- Lëtzebuerg - Diddenuewen - Metz
- Lëtzebuerg - Esch - Rodange
D’ Alessandra Nonnweiler, Porte-Parole vun der CFL erkläert, datt dës Aarbechte wärend der Vakanz gemaach ginn, fir d'Sécherheet an de Confort vun de Cliente ze garantéieren.
D’ Zuchlinne Lëtzebuerg-Klengbetten-Arel a Lëtzebuerg-Beetebuerg falen iwwert ganz Vakanz aus. Op de Strecken Ettelbréck-Gouvy a Kautebaach-Wooltz fuere vun 19:40 – 04:00 Auer moies keng Zich.
Schinnenersatzverkéier
D’ Aarbechte bestinn ënner anerem aus Gleiserneierungen, Aarbechten um Drainage-System a Préparatiounsaarbechten fir d’ Houwalder an d’ Beetebuerger Gare. D’ Leit déi op den Zuch ugewise sinn, kréien Ersatz vun der CFL bereet gestallt, esou d’ Alessandra Nonnweiler vun der CFL.
Des Weidere mellt d’ CFL nach, datt vum Weekend un an op de Feierdeeg een Zuch méi wéi bis elo tëschent der Stad an Ëlwen an tëschent der Stad an Ettelbréck zirkuléiere wäert. Méi Informatiounen dozou, sou wéi zum Ersatzverkéier wärend der Ouschtervakanz fënnt een op der Internetsäit oder der App vun der CFL.
