Bei der Migratioun bräicht ee gemeinsame Reegelen, fir gemeinsam Problemer. Zu Lëtzebuerg goufen d’lescht Woch d’Reegele fir Asyl-Demandë jo verschäerft. Männlech Flüchtlingen, déi eleng reesen, a fir d’éischt an engem aneren EU-Land ukoumen, ginn net méi an de Flüchtlingsstrukturen zu Lëtzebuerg opgeholl.
D’ASBL Passerelle, déi sech fir d’Uleies vu Flüchtlingen asetzt, huet dat verurteelt, et wier ee flagrante Verstouss géint Mënscherechter, a géint déi international an europäesch Engagementer vu Lëtzebuerg. De Xavier Bettel sot zu den Ännerungen an der Asylpolitik hei am Land, datt wa keng Plaz méi do wier, et och kee Wäert hätt sou ze maache wéi wann et kee Problem gëtt.
"Mir hunn d’Häerz op der richteger Plaz, mee mir hunn och d’Gehier op der richteger Plaz. A wa kéng Plaz méi do ass, dann huet et kee Wäert esou ze maachen, wéi wa mer kee Problem hunn. An d’Flüchtlings-Situatioun ass déi, datt mer am Moment et net méi packen. Net méi als Land – an och als EU gëtt et ganz kriddeleg Dofir ass et wichteg, dass d’Solidaritéit zielt, well et ginn nach Länner, déi Sputt hunn. An et kënne net ëmmer déi üblech sinn, déi Solidaritéit weisen. Mir kommen och eng Kéier un eis Limitten, an dat ass eben d’Realitéit."
