D’Organisatioun fir Ekonomesch Zesummenaarbecht an Entwécklung huet hir Prognos fir de weltwäite Wirtschaftswuesstem op en neits no Ënnen ugepasst.
Stëllstand
Deemno rechent d’OECD elo fir 2025 mat engem globale Wuesstem vun nëmmen nach 3,1 Prozent. Domat géif een um Taux vum lëschte Joer hänke bleiwen. Besonnesch d’Prognose fir déi westlech Wirtschaft fale méi schlecht aus wéi erwaart.
An Europa gehéieren déi 2 Wirtschaftsriesen Däitschland a Frankräich zu de grousse Verléierer vun der neister Aschätzung. Wärend Frankräich nëmme liicht ënnert den Erwaardunge läit, rechent d’OECD an Däitschland mat just ronn hallef sou vill Wuesstem, wéi nach zejoert erwaart.
Mee och den amerikanesche Wirtschaftswuesstem gëtt méi schwaach ageschat wéi nach d’lescht Joer. E potentiellen Handelskrich tëschent den USA a sengen Nopeschlänner ënnert dem Donald Trump senger Regierung suergt fir vill Veronsécherung.
Onsécherheeten
Mam Dow Jones ass dee wichtegsten Aktien-Index un der amerikanescher Bourse zënter Mëtt Februar um Falen. Déi weltwäit Wirtschaft géif Momentan duerch onrouegt Gewässer seegelen, sou d’Conclusioun vum Chef-Ekonomist Alvaro Santos vun der Organisatioun fir Ekonomesch Zesummenaarbecht an Entwécklung.
Fir Lëtzebuerg rechent de Statec dëst Joer mat enger Croissance vum PIB vun 2,5 Prozent. Déi Previsioun ass allerdéngs scho vum Dezember. Ob se bei 2,5 Prozent bleift, bleift ofzewaarden.
