Tëschent der Dicks-Strooss an dem Rond-point um Prënzeréng soll ee Sens unique entstoen, huet de Schäffe Meris Sehovic vun déi gréng erkläert. Dowéinst dierfte Parkplazen ewech falen.
“All dës Moossnamen déngen der Berouegung vun der Strooss, op deem doten Tronçon. Fir d’Awunnerinnen an d’Awunner bedeit dat konkret manner Kaméidi, manner Autoen, méi Sécherheet virun der Dier an e Wunnëmfeld, wou ee gär ënnerwee ass.”
Dem Escher Schäffe Meris Sehovic no, géif et fir Famillje mat Kanner ëm d’Sécherheet vun hirem Alldag goen.
“Eng Strooss, wou ee sech net méi muss duerch d’Autoen duerchdrécken, ass eng Strooss, wou een erëm mam Kand zu Fouss oder mat der Trottinette fort ka goen, ouni Angscht mussen ze hunn. Fir déi lokal Butteker a Caféen ass et eiser Meenung no eng Chance. Mënsche bleiwen éischter stoen, kucken an d’Vitrinn, drénken eng Taass Kaffi oder kafen eppes Klenges, wa se sech wuel fillen. Dëst ass also e klore Plus fir de Commerce a fir d’Liewensqualitéit am Zentrum.”
Ordinär Budgetsiwwerschëss fir 2026 bis 2028 virgesinn
Donieft gouf am Gemengerot de Finanzementsplang fir d’Joren 2026 bis 2028 virgestallt. Dee gesäit fir déi nächst dräi Joer ordinäre Budgetsiwwerschëss vun tëscht bal 40 an net grad 51 Milliounen Euro vir.
De Buergermeeschter Christian Weis (CSV) huet an deem Kontext vun enger signifikanter Verbesserung trotz ugespaantem Finanzementsplang geschwat. D'Schold vun der Escher Gemeng soll 2028 bei ronn 197 Milliounen Euro leien.
450.000 Euro fir de LOA
Déi Escher Gemeng ënnerstëtzt de Museksfestival LOA dëst Joer, grad wéi 2026 an 2027 mat all Kéier 150.000 Euro. De “Luxembourg Open Air” fir elektronesch Musek gëtt et zënter 2019. Dëst Joer ass dëse Festival den 9. an den 10. Mee op Esch-Belval.
