D‘UNRWA huet déi concernéiert Employéen direkt entlooss. Eng Rei Länner hu wéinst dëse Reprochen hir Finanzéierung vun der Organisatioun gestoppt, dorënner d‘USA, Groussbritannien an Däitschland.
Den UNO-Generalsekretär Antonio Guterres huet an engem Communiqué Konsequenze fir déi involvéiert Mataarbechter annoncéiert, hien huet awer och un déi Staaten appelléiert, déi hir Bäiträg gestoppt hunn, fir op d‘mannst de weidere Fonctionnement vum Hëllefswierk ze garantéieren, vun deem 2 Millioune Mënschen ofhänken, fir kënnen z‘iwwerliewen.
Iwwerdeems wiisst d‘Hoffnung fir e weidere Geisel-Austausch tëscht de Konfliktparteien. Wéi d‘New York Times mellt, hätten amerikanesch Negociateuren op Basis vu Propose vu béide Säiten en Entworf ausgeschafft, iwwert deen haut zu Paräis soll diskutéiert ginn. Dora wier virgesinn, datt d‘Hamas méi wéi 100 Geisele fräiléisst, an Israel dofir fir ronn zwee Méint seng militäresch Operatiounen an der Gazasträif stoppt.
