A wéi enger Funktioun d’Zaldoten der Police hëllefe kéinten, soll haut beschwat ginn. De Premierminister Ulf Kristersson wëll haut mam Chef vum Militär a mam Chef vun der Police zesummekommen.
Problemateschen Impakt op d'Jugend
Schweden, an och keen anert Land an Europa, hätt esou eppes jee erlieft, sot hien an enger Ried zur Lag vun der Natioun. Dëse Mount ass d’Bandegewalt am Land op en Neits eskaléiert. Hannergrond ass schwedesche Medien no e Konflikt innerhalb vum kriminelle Foxtrot-Netzwierk.
De Chef vun där Organisatioun soll an ee Sträit mat engem Kompliz gerode sinn. Problematesch ass virun allem och den Impakt op d’Jugend: Heefeg rekrutéieren dës Bande Mannerjäreger fir d’Attacken duerchzeféieren.
Méi Rechter fir d'Police als Léisung?
Dem Ulf Kristersson seng Mëtt-Riets Beweegung huet schonn d’lescht Joer méi schaarf Mesure géint dës Kriminalitéit versprach. Der lénker Virgänger-Regierung huet hie virgeworf, hei net genuch ënnerholl ze hunn.
Mee och dem Kristersson seng Regierung krut d’Lag bis elo net wierklech an de Grëff. Elo wëll hien d’Strofgesetz änneren, fir datt d’Police méi Rechter kritt, Täter méi schwéier Strofe kréien an Zeie besser geschützt sinn.
