D'Rees a Groussbritannie gëtt e bësse méi deier a méi ëmständlech, well déi brittesch Regierung Grenziwwergäng digitaliséiert.
An dofir brauch ee vum 2. Abrëll un eng Electronic Travel Authorization, kuerz ETA, genannt. Dat ass eng Geneemegung, déi jidderee muss hunn, dee kee Visa a kee brittesche Pass huet an an England, Schottland, Wales oder Nordirland reese wëllt. Och fir Kanner a Bëbeeë musse se ugefrot ginn. Irlänner brauche keng ETA.
D'Geneemegung kascht 10 Pond. Dat sinn ëmgerechent ronn 12 Euro. An den 9. Abrëll gëtt se op 16 Pond eropgesat. Dat sinn dann 20 Euro. D'Geneemegung gëllt 2 Joer laang an dat fir Openthalter vu manner wéi 6 Méint.
Wéi freet ee se un?
Dat geet nëmmen digital. Et kann ee se op der offizieller Websäit vun der Regierung ufroen. Am Einfachsten ass et, et luet ee sech déi offiziell UK ETA App op den Handy. Da muss een eng Foto vu sech a vum Pass, mat deem ee reest, eroplueden an eng Rëtsch Froe beäntwerten. Zum Beispill wëllt d'Regierung wëssen, wou ee wunnt, wat ee schafft an op ee virbestrooft ass. Et brauch een näischt auszeprinten, well d'Geneemegung digital mam Pass verbonnen ass.
D'Regierung réit awer dovun of duerch Agencen ze goen, well dann nach zousätzlech Kaschten dobäi kéinte kommen.
Iwwregens brauch ee keng Geneemegung, wann ee just am Transit ass. Dat heescht, wann een de Flughafen net verléisst. Dat gouf decidéiert, nodeems sech den Heathrow Airport, dee gréisste Fluchhafen an Europa, beschwéiert hat.
