Den Drock op d’Wieler hätt eng nei Dimensioun erreecht, hunn onofhängeg Walobservateuren a Russland kritiséiert. Dosende Leit wiere festgeholl ginn. Beschäftegter aus Staatsentreprisë solle forcéiert gi sinn, ze wielen.
Gutt zwee Joer nom Ufank vum russesche Krich géint d’Ukrain, gouf och an ukrainesche Gebitter gewielt, wat international net unerkannt ass.
Wale ware weder fräi, nach fair
Déi sougenannte Presidentschaftswalen a Russland gëllen als ondemokratesch, well zum Beispill keng Kandidate vun der Oppositioun zougelooss waren.D’Walen a Russland wieren offensichtlech weder fräi nach fair gewiescht, heescht et an der éischter Reaktioun vun den USA.D’Walfälschung hätt keng Legitimitéit, esou d’Reaktioun vum ukrainesche President Wolodymyr Selenskyj. De “russeschen Diktator” hätt Wale simuléiert.
Putin schléisst Konflikt mat der NATO net méi aus
De Wladimir Putin selwer huet gëschter Owend zu Moskau gesot, een ëmfaassende Konflikt mat der NATO wier net auszeschléissen, an an deem Fall wier d'Welt nëmmen ee Schrack vun engem Drëtte Weltkrich ewech. Hie géif et fir onwarscheinlech halen, datt een dorun interesséiert wier, esou de russesche President, deen elo bis op d’mannst 2030 ka weider regéieren.
De Putin huet och behaapt, datt scho vill Zaldoten aus NATO-Memberstaaten an der Ukrain am Asaz wieren.
An um drëtten a leschten Dag vun de Walen a Russland hu gëschter Dausende Mënschen un enger Widderstandsaktioun Deel geholl. Um Punkt 12 Auer hu si sech viru verschiddene Walbüroen a Russland versammelt, fir hir Onzefriddenheet auszedrécken an däitlech ze maachen, datt si géint de Krich sinn.
