Den zoustännegen Autoritéiten no kéint just ausgeschloss ginn, datt d’Verschmotzung vun den Hafeninfrastrukturen oder vun de Schëffer, déi zu deem Zäitpunkt am Hafe louchen, verursaacht gouf.
Eng genee Quantitéit u Pëtrol déi an d‘Musel gefloss ass, konnt d‘Ministesch nach net nennen, well en Deel direkt mat de Stréimunge vum Floss fortgedroe gouf. Et géif sech awer warscheinlech ëm e puer Dose Liter handelen.
D‘Botzaarbechte wieren entretemps ofgeschloss. No éischten Evaluatioune wier och keen direkten negativen Impakt op d’Ëmwelt festgestallt ginn, wéinst der warscheinlech klenger Quantitéit u Pëtrol.
Generell géif esou eng Verschmotzung awer ee Risiko fir d‘Natur duerstellen, dofir géif d‘Situatioun weider iwwerwaacht ginn, esou nach d‘DP-Ministesch.
De Mäerterer Hafen hat iwwerdeems eng Plainte géint Onbekannt wéinst Ëmweltverschmotzung bei der Police eragereecht.
