Bis d’Situatioun sech berouegt, kënnen am Süde bis zu 5 cm Schnéi falen. Am Norde souguer nach bësse méi, betount de Meteolog. Et wier souguer méiglech, datt de Schnéi leie bleift, bis datt d’Sonn sech am Nomëtteg weist.
De Luca Mathias erkläert awer och, datt duerch d’Minustemperaturen nuets, dee geschmolte Schnéi erëm fréiere kann an et doduerch och erëm plazeweis ka glat sinn.
Trotzdeem soll d’Situatioun sech nom Dag vun haut erëm berouegen.
Déi kal Temperature bleiwen awer nach bis ufanks nächster Woch. Vun e Méindeg un zitt dann en Déifdrockgebitt iwwer d’Land, wouduerch et och erëm zu Temperature bis 10 Grad ka kommen.
