Et gi Gewënner a Verléierer am Lëtzebuerger Commerce, dat ass den éischte grousse Constat am Retail Rapport 2024.
Bäcker a Metzler als Verléierer
Zu de Verléierer gehéiert d'Liewensmëttelhandwierk mat Bäcker a Metzler respektiv dem Liewensmëttelhandwierk generell. Hei geet d'Zuel vun de Points de Venten däitlech erof.
Liewensmëttelhandel a Baumäert als Gewënner
De Mëttelstandsminister Lex Delles gesäit och Gewënner:
"Mir gesi bei de Gewënner, datt de Liewensmëttelhandel am meeschte bäigeholl huet, also d'Surfacen, wou Liewensmëttel verkaf ginn. Do hu mer iwwer 100 nei Verkafspunkten, wat e Plus vu 17,3% ass."
Aner Gewënner si Baumäert a Geschäfter, déi Accessoire fir Motorrieder verkafen.
Horeca-Secteur entwéckelt sech ongläichméisseg
Eng ongläichméisseg Entwécklung huet den Horeca Secteur. D'Zuel vun de Restauranten ass zënter 2019 nëmme ganz liicht geklommen. Déi vun de Fast Food'en ass ëm iwwer 23 Prozent gewuess. Bei de Bistroen ass et e Minus vun 9 Prozent.
D'Tendenz, fir aus dem Stadkär eraus op d'Gréng Wiss ze goen, hält iwwerdeems weider un, wéi den Tom Baumert, den Direkter vun der Luxembourg Confederation, erkläert, datt an de Stadkären d'Flächen ofhuelen.
Do si mir op 134.000, dat sinn dann eben 10% manner wéi nach viru fënnef Joer. Do gesäit een eben, dass, wéi esou den Trend aus der Mode erëmkënnt. Datt ee grouss Fläche brauch, déi fënnt een net onbedéngt an de Stadzentren. Op der anerer Säit hunn d'Centre-commerciauxen un 10% Fläch zougeluecht hunn.
Eidelstoend Geschäftsflächen huelen of
Positiv notéiert gëtt, datt d'Surface vu Geschäfter, déi eidel stinn, ëm 0,4 Prozent erof gaangen ass. Déi Geschäftsfläch leeft eenegermoosse parallel mam Bevëlkerungswuesstem, sou d'Auteure vum Rapport, a beleeft sech momentan op 1,66 Meterkaree pro Awunner. Op europäeschem Niveau ass dat e vergläichsweis héije Wäert.
