Duerch d’Zréckbehale vun engem Deel vum REVIS géifen d’Leit an eng Ofhängegkeet rutschen, erkläert de Sergio Ferreira vum Lëtzebuerger Flüchtlingsrot. D‘Flüchtlingen déi op Lëtzebuerg kommen, bräichten Autonomie amplaz Ofhängegkeet.
„Et ass e falsche Schrëtt am Sënn vun der Integratioun vun deene Leit.“
Flüchtlingen, déi an de Foyere wunnen, bezuelen och elo schonn e Loyer. Dofir ënnerschreiwe si en Dokument, erkläert de Sergio Ferreira, an dat wier leider kee Contrat de Bail.
„Dat aktuellt Dokument, dat si ënnerschreiwen, gëtt hinne just d’Flichten – an net d’Rechter. An dat ass inakzeptabel.“
Bildung an Zougang zum Aarbechtsmarché spille keng Roll
Fir d’Sozial Inklusioun gesäit de Koalitiounsaccord vir, datt all Demandeur de Protection internationale Sproochecoursen a Coursen iwwer d‘Zesummeliewen obligatoresch solle beleeën. Et géifen awer wichteg Punkte fir déi sozial Inklusioun net opgezielt ginn, ënnert anerem den Zougang zum Aarbechtsmarché an zur Bildung.
„Fir eng richteg Integratioun musse mer, notamment wann et mat Sproochen ze dinn huet, intensiv Course maachen. Net just Alibi-Coursen vun 100 Wierder op Lëtzebuergesch, dat de Leit näischt bréngt, mee mir musse richteg investéiere fir duerno d’Resultat ze kréien. Fir datt duerno d’Leit kënne schaffe goen, hir Steiere bezuelen an hiert normaalt Liewe maachen, sou wei jidderee vun eis.“
De Lëtzebuerger Flüchtlingsrot weist sech a senger Analys och besuergt, datt Lëtzebuerg den europäesche Pakt fir Migratioun matgedroen huet an erënnert d’Regierung drun d’Menscherechter am Kontext vum Asylpakt ze evaluéieren.
