100komma7.lu

/ Lëtzebuerg investéiert 320 Milliounen Euro an international Klimaschutzprojeten

An den nächste 5 Joer

Haut - 12h03

Lëtzebuerg investéiert 320 Milliounen Euro an international Klimaschutzprojeten

Lëtzebuerg investéiert an den nächste fënnef Joer 320 Milliounen Euro an international Klimaschutzprojeten: Dës Zomm huet den Ëmweltminister Serge Wilmes um Dënschdegmoien an der Chamber widderholl. Do gouf an enger gemeinsamer Sitzung vun der Finanzkommissioun an der Ëmweltkommissioun iwwer de “Financement climatique international” diskutéiert.

1 min

Den Ëmweltminister Serge Wilmes. (Foto: MECB)

Ee Changement an dësem Beräich wier, datt d'Regierung déi budgetär Envelopp "considerabel" géif an d’Luucht setzen, erlkäert de Serge Wilmes no der Sitzung.

"Dat hu mer jo scho viru Baku decidéiert gehat, virun der COP vum leschte Joer. Mir sinn amgaangen awer elo déi Strategie, déi jo och drun hänkt un der internationaler Klimafinanzéierung, op de Leescht ze huelen. Mee wat ganz wichteg fir dës Regierung ass, datt mer vill méi Synergien och sichen tëschent deenen dräi COPen."

Lauschteren

De Serge Wilmes erkläert, datt d'Investitiounen an Zukunft ëmmer erëm dräi Voleten zesumme behandele sollen. Nämlech de Klimawandel, d'Biodiversitéit an och de Landverbrauch. Dat wier eng vun de groussen Ännerungen, esou den Ëmweltminister Serge Wilmes am 100,7-Interview.