240 vun den 1.200 Horesca Betriber sinn aktuell bei dësem Projet dobäi. Si bidden de Leit an hiren Etablissementer Drénkwaasser vum Krunn un. Dat ass vill méi ëmweltfrëndlech wéi d’Markewaasser aus de Fläschen. Fir de Projet kruten d'Betriber déi matmaache 24 gratis Waasserfläschen à 750 ml ugebueden. Do ass e QR Code drop, mat deem de Client sech kann iwwer d'Qualitéit vum Waasser informéieren.
Wat kascht et de Client?
“Jidderee ka froe wat e wëllt”, seet den Alain Rix, “Deen et fir näischt wëllt ginn, dee mëscht dat. Deen deen eppes wëllt froen, mécht dat och”. Schliisslech wier dat Drénkwaasser mat Käschte verbonnen. Aktuell gi Präisser tëschent 2 € an 2€90 gefrot. D'Hotelieren, d'Restaurateuren an d'Cafetiere mussen d’Waasser bezuelen, d'Fläsche spullen, si verbrauchen och Elektresch dofir. “Bei all deem soll de Projet a kengem Fall dozou féieren, datt de Secteur manner verdéngt", seet den Alain Rix.
Et wier zum Beispill och normal, datt e Stärerestaurant méi deier freet, ewéi e Café oder eng Brasserie. Dat einfach well de Service vill méi deier ass.
Verglach mat Frankräich
A verschiddene Länner, ënner anerem a Frankräich, ass et normal, datt een fir näischt eng Karaff Waasser op den Dësch kritt. “Dir kënnt dat franséischt Drénkwaasser net mat eisem vergläichen”, seet den Alain Rix. Zu Paräis zum Beispill kann ee kee Waasser drénken...Dat ass voller Chlor."
