Déi israeelesch Arméi hat gëschter iwwerraschend matgedeelt, datt se Truppen aus der Stad Chan Junis am Süde vun der Gazasträif zeréckzitt. Et ass onkloer, ob dat méiglecherweis och an Zesummenhang kéint stoe mat neie Verhandlungen haut zu Kairo iwwer eng Wafferou an d'Fräiloossung vun de Geiselen.
Zu Jerusalem ware gëschter nees zéngdausende Leit op der Strooss gaange fir géint d‘Regierung vum Benjamin Netanjahu ze protestéieren. Si geheien der Regierung vir, engem Accord fir d‘Liberatioun vun de Geiselen am Wee ze stoen. Dës Protester daueren elo scho ronn eng Woch laang.
