Et soll sech am ganzen ëm 6 Männer handelen am Alter tëschent 22 a 40 Joer. Dat si wuel déi lescht nach lieweg Geiselen, déi an der éischter Phas vum Waffestëllstand fräigelooss ginn. Am Géigenzuch soll Israel dem Accord no ronn 600 palästinensesch Prisonéier virzäiteg entloossen.
Ausserdeem sollen d‘Hamas d‘Läich vun der Schiri Bibas un d‘Rout Kräiz iwwerreecht hunn. D‘Famill huet dat confirméiert. U sech hätt dat scho solle virgëschter geschéien, mee do goufen déi stierflech Iwwerreschter vun enger anerer Persoun iwwerginn. D’Hamas hat behaapt, d’Läich no engem israeelesche Loftugrëff verwiesselt ze hunn.
