D’Manifestanten hunn der Regierung an dem Premier Benjamin Netanyahu virgeworf net genuch ënnerholl ze hunn fir d’Geiselen nees ze befreien.
Ausléiser vum Krich an der Gazasträif war de Massaker vum 7. Oktober wéi 1.200 Israeeli vun extremistesche Gruppen ëmbruecht goufen. 250 Persoune goufen als Geisel verschleeft. 105 vun hinne goufe fräigelooss.
Kritik vun der UN un Israel
Mee déi israeelescch Militäroffensiv an der Gazasträif gëtt ëmmer méi kritiséiert, d’UN-Agence fir déi palestinensesch Refugiéen, schwätzt vun 100 Deeg un Doud an Zerstéierung.
De Generalkommissär vun där UN-Agence den Philippe Lazzarini huet an enger Deklaratioun ënnerstrach, datt d’Palestinenser an der Gazasträif wéinst dem Konflikt stierwen, hir Wunnengen an Infrastrukture sinn zerstéiert ginn, ee groussen Deel vun der Populatioun gouf deplacéiert, si leiden un Honger an dem Manktem un Drénkwaasser. D’Spidolsinfrastrukturen kéinten net méi normal funktionéieren.
Bis elo 23.000 Doudeger
D’Majoritéit vun den Mënschen, inklusiv d’Kanner wieren zu déifst traumatiséiert.
Der palestinensescher Gesondheetsverwaltung no, déi vun der Hamas kontrolléiert gëtt, wiere bis elo iwwer 23.000 Palestinenser an der Gazasträif ëm d’Liewe komm.
