Just d’Base légale géif nach feelen. Déi läit aktuell pour avis beim Staatsrot. Soubal d’Gesetz gestëmmt wier, wier een awer relativ séier prett, ënnersträicht d’Stéphanie Obertin. D’Dokumenter an der e-Wallet kréien déi selwecht juristesch Valeur, wéi dat physescht Dokument.
"Dat wäert dann am Gesetz festgehale ginn, datt een am Fong net opgefuerdert ka ginn, och seng Plastikskäertche missen ze weisen. Mee déi digital Attestatioun huet déi selwecht Valeur probante wéi d’Plastikskäertchen."
Mandat numérique a virtuell Rendez-vousen
Zwee aner digital Projeten, déi scho relativ wäit fortgeschratt sinn, sinn de Mandat numérique an de Rendez-vous virtuel, deen et de Bierger géif erméiglechen, e virtuelle Meeting mat engem Agent ze huelen. Dee Meetingsraum wier mat Luxtrust securiséiert.
"An de Mandat numérique, dee wäerte mir hoffentlech Enn 2025 fäerdeg hunn. Deen erlaabt am Fong enger Persoun, déi net esou digital affin ass, eng Personne de confiance oder e Familljemember kënnen ze mandatéieren."
Déi designéiert Vertrauenspersoun oder Familljemember soll dann d'Demarche maache kënne fir déi aner Persoun.
