Beim Accident de 16. Mäerz op der Kräizung Avenue Victor Hugo a Rue Ermesinde um Lampertsbierg ware sechs Persoune blesséiert ginn, an een Auto louch op der Kopp um Trottoir.
Dobäi wier vill ze héich Vitess vun engem Auto am Spill gewiescht, esou den DP-Politiker. D’Police-Enquête wier nach net ofgeschloss.
Ugekënnegt Verkéiersberouegung um Lampertsbierg
Aus dem ganze Lampertsbierg soll eng Tempo-30-Zon ginn, huet de Patrick Goldschmidt ugekënnegt. De Moment géif nach an dräi Stroossen d’Maximalvitesse vu 50 Kilometer an der Stonn gëllen. Fir ee Changement wier een Accord vu staatlecher Säit néideg.
“An dann hu mer esou eng Strooss wéi eng Faïencerie-Strooss, wou eng riicht Streck ass, an da verstinn ech, wann d'Leit soen, 30 ass schéin a gutt, mee wann ech do ka rennen, da bréngt dat näischt. An do wäerte mer dann déi Knuppen, déi esou sougenannte Berliner Kissen de Leit emol proposéieren."
Dem Stater Mobilitéitsschäffe Patrick Goldschmidt no, géif et dobäi och dorëm goen, den Transitverkéier aus dem Quartier Lampertsbierg eraus ze kréien.
“Fir déi Leit, déi nëmmen duerch de Quartier fueren, an net am Quartier ufänken oder ophalen, fir déi erauszehalen. An da mussen awer d'Leit am Quartier och een Ëmwee maachen, e klengen nëmmen. Mee mir sinn iwwerzeegt, dass mer doduerch d'Zuele vum Verkéier reduzéiert kréien um Lampertsbierg.”
Petitioun fir méi Verkéierssécherheet um Lampertsbierg
Eng 300 Bierger:innen um Lampertsbierg hunn nom Verkéiersaccident vu Mëtt Mäerz Ënnerschrëfte gesammelt. D’Petitioun fuerdert méi Verkéierssécherheet am Quartier. Verlaangt ginn och baulech Mesuren, fir datt sech un d’Vitess an den Tempo-30-Zone gehal gëtt, esou déi Lampertsbierger Biergerin Maureen Stoll um Freideg am 100,7-Interview. D’Petitioun soll d’nächst Woch un de Stater Schäfferot geschéckt ginn.
De Stater Mobilitéitsschäffe Patrick Goldschmidt huet schonn elo am 100,7-Interview dorop reagéiert, am Kontext vun der Plaz an dem Zäitpunkt vum Accident vu Mëtt Mäerz um Lampertsbierg.
“Wéi Dir richeg sot, an och d'Petitionären, hei si mer niewent enger Schoul, et war en plus Mëttegstonn. An e puer Minutte wieren do Schoulklasse laanscht gaangen. Also mir wëllen eis net ausdenken, wat dann alles hätt kënne geschéien.”
De Stater Schäfferot hätt sech virgeholl, d’Quartiersberouegung wat de Verkéier ugeet ze maachen, esou de Schäffe Patrick Goldschmidt.
“Mir sinn amgaangen a verschidde Quartieren, entre autres de Lampertsbierg, Berouegungsmesurë festzeleeën. An a puer Woche wäerte mer an de Quartier goen, op de Lampertsbierg, onofhängeg vun deem Accident, dat ass scho ganz laang geplangt, wou mer verschidde Mesurë wäerten huelen.”
Nieft Berouegungsmesure wieren awer och Verkéierskontrollen duerch d’Police wichteg, esou de Stater Mobilitéitsschäffe Patrick Goldschmidt. Mee d’Police kéint net all Dag all Strooss an der Stad kontrolléieren.
