Déi europäesch Verdeedegung a Sécherheet hätt ee Wendepunkt erreecht, hat d'EU-Kommissiounscheffin Ursula von der Leyen kuerz virun der Entrevue op X geschriwwen. No der Reunioun huet si matgedeelt, d'Treffen hätt nach eemol däitlech gemaach, datt et e Fridde bräicht, deen d’'Onofhängegkeet an d'territorial Integritéit vun der Ukrain respektéiert. Dat gesinn déi Europäesch Länner duerch dem amerikanesche President Trump seng Friddenspläng a Gefor.
Puer Länner bereet, Friddenstruppen an d'Ukrain ze schécken
Och den däitsche Bundeskanzler Olaf Scholz sot no der Reunioun, datt een der Ukrain net dierft de Fridden opzwéngen.
Am Virfeld vun der Reunioun hate Groussbritannien, Holland an och Schwede matgedeelt, datt een oppe wier, Zaldoten an d'Ukrain ze schécke fir als Friddenstruppen ze agéieren.
Fir den Olaf Scholz net de richtegen Zäitpunkt
Den Olaf Scholz war awer vun dësen Aussoen irritéiert a sot et wier de komplett falschen Zäitpunkt fir esou Diskussiounen. De Kanzler sot och et dierft keng Opdeelung vu Sécherheet a Responsabilitéit tëschent den USA an Europa ginn, et misst een an der NATO hei als Partner handelen.
Den Olaf Scholz huet sech doniewent dofir ausgeschwat, den EU-Länner bei de Scholde méi Spillraum ze loossen, fir datt si méi an d'Verdeedegung investéiere kënnen. Och den NATO-Generalsekretär Mark Rutte war zu Paräis a sot no der Reunioun, Europa wier capabel der Ukrain Sécherheetsgarantien ze liwweren.
