Als Deel vun der Campagne Screen-Life-Balance vum Ministère fir Educatioun, Kanner a Jugend, soll mam CreativeLab net nëmmen d’Zäit virum Ecran reduzéiert, mee och d’Gläichgewiicht tëschent der digitaler an der realer Welt gefërdert ginn. 22 Partner aus dem Kulturberäich si bis elo dobäi. Weider potentiell Offere musse fir d'éischt vum Ministère fir Educatioun bewäert ginn.
D’Lyceeë kënnen d’Schüler do fir verschidden Aktivitéiten ausserhalb vum Unterrecht umellen. Ënnert de Partner sinn ënner anerem Muséeën, Concertshalen an Theateren.
Kulturacteuren kënne méi konkret cibléieren
De Gilles Lacour, Coordinateur vum Projet a Regierungskommissär, erkläert firwat dëse Projet och fir de Kultursecteur interessant ass.
"Si hunn Accès un d'Schüler, un déi Jonk, dat heescht, dat ass hire Public vu muer, si kommen un déi erun, si kënnen deenen am Fong moossgeschneidert Aktivitéiten ubidden, déi wierklech op si gemënzt sinn, déi fir si geduecht sinn."
Doriwwer eraus kënnen d'Acteuren aus der Kultur fräi definéieren, wéi eng Altersgrupp si usprieche wëllen, esou nach de Gilles Lacour.
De CreativeLab wäert och en integralen Deel vun der neier Plattform Extraklass sinn, op där all pedagogesch Offeren aus der Zivilgesellschaft fir Schoule regruppéiert ginn. De Site, deen haut virgestallt gouf, ass vun elo u schonn iwwer creativelab.lu erreechbar.
Text vum Luca Di Santolo
